Súkkulaðiframleiðandinn Omnom hefur sett nýtt súkkulaði á markað. Um er að ræða fyrsta 100% súkkulaðistykkið sem búið er til á Íslandi og inniheldur það engan sykur, enga mjólk, engin bragðefni og enga ávexti né hnetur.

„Engan veginn fyrir alla en 100% fyrir suma,“ segir í fréttatilkynningu frá fyrirtækinu.

„Þegar unnið er með 100% súkkulaði er mikilvægt að velja kakóbændur sem leggja alúð í sína vinnu. Enn mikilvægara er að vanda til verka við ristun baunanna þar sem hún spilar lykilatriði í hreinu súkkulaði. Við ristuðum baunirnar lengi við lágan hita,“ útskýrir Kjartan Gíslason, annar stofnenda Omnom, í tilkynningunni.

Súkkulaðið heitir Peru 100% og er búið til úr hvítu kakóbauninni Gran Nativo Blanco sem var uppgötvuð fyrir tilviljun árið 2008 í norðurhluta Perú. Þá hafði hún verið hulin í meira en öld. Er bragði Peru 100% lýst sem bitrum keimi af ristuðum valhnetum, örlitlum tóni af papæja- og sítrusávöxtum og flauelsmjúkri áferð í lokin.

„Við höfum unnið að þróun á góðu 100% súkkulaði í mörg ár en er þetta í fyrsta skipti sem að við gefum út slíkt súkkulaði,“ segir Kjartan, en nýja súkkulaðið er aðeins til í takmörkuðu upplagi.