Í Fréttablaðinu í dag birtir verslunin SÚPER auglýsingu fyrir alls kyns matvöru. Auglýsingin hefur svo sannarlega ruglað Íslendinga í ríminu í morgunsárið, enda afar óvenjuleg.
Í auglýsingunni sést Jón Gnarr í gervi auglýsa furðulega matvöru, til dæmis kjúklingastrumpa úr 100% íslensku svínakjöti.
„Svínakjöt sem bragðast eins og kjúklingur. Ekki láta þetta góðgæti framhjá þér fara,“ stendur í auglýsingunni. Einnig er boðið upp á fisk sem er búinn til úr 100% svínakjöti. Svo er það þessi klausa:
„Nú eru fjölskyldudagar hjá Íslandssvín. Börnin velja saman grís sem sérfræðingar Íslandssvína hjálpa svo pabba að slátra. Matgæðingar okkar leiðbeina mömmu við matreiðsluna og svo borðar fjölskyldan saman.“
Mikil umræða hefur skapast um auglýsinguna á Facebook, til dæmis í hópnum Markaðsnördar.
„Hvað er þessi auglýsing bara? Er súper búð? Ef svo hvar er hún? Og af hverju er hún í samstarfi með Þjóðleikhúsinu? Eða á þetta að kynna ehv leikrit? Aldrei verið jafn confused við að lesa blaðið,“ skrifar Arnar Kjartansson, sem hittir einmitt naglann á höfuðið. Auglýsingin er fyrir nýju leiksýninguna Súper eftir Jón Gnarr sem frumsýnd verður þann 16. mars í Kassanum.