Starfsmenn eldhússins í Hvíta húsinu þurfa oft að elda fyrir voldugasta fólk heims, en á vef Daily Meal er að finna skemmtilegan fróðleik um eldhúsið.
Í Hvíta húsinu ríkja enn hugmyndir um úrelt kynjahlutverk og því er það hlutverk forsetafrúnna að sjá um eldhúsið og starfsfólk þess. Sumar þeirra, eins og Mamie Eisenhower, hafa tekið virkan þátt í eldhússtörfunum á meðan aðrar, eins og Eleanor Roosevelt og Melania Trump, skipta sér lítið af daglegum rekstri.
Bandaríkjaforseti er með hnapp á skrifstofunni sinni og getur ýtt á hann til að panta sér snarl yfir daginn. Donald Trump ýtir á hnappinn til að panta sér ískalda kók á meðan Barack Obama nýtti sér hnappinn til að panta sér ylvolgan tebolla.
Yfirkokkurinn í eldhúsi Hvíta hússins er Cristeta Comerford, en hún hefur gegnt því starfi í tólf ár. Hún er fyrsta konan til að starfa sem yfirkokkur í Hvíta húsinu og jafnframt fyrsta asíska manneskjan til að gegna þessu starfi. Hún er fædd á Filippseyjum og kom til Bandaríkjanna árið 1985, þá 23ja ára gömul.
Allur matur þarf að fara í gegnum bandarísku alríkislögregluna, FBI, áður en hann er settur fyrir framan forsetann. Það gilda ýmsar reglur um matinn og þarf að senda mat sem kemur að utan til starfsmanns Hvíta hússins svo enginn viti að forsetinn eigi að fá hann. Þá þarf ávallt að senda hótelmat forsetans á herbergi einhvers annars svo komist ekki upp að forsetinn hafi pantað matinn.
Starfsmenn eldhússins eru öllu vanir og geta kokkað upp veislu fyrir 140 gesti með stuttum fyrirvara ef svo ber undir. Ef forsetahjónin vilja bjóða til stórrar veislu getur eldhúsið eldað rétti fyrir allt að þúsund manns.
Skattgreiðendur í Bandaríkjunum þurfa ekki að hafa áhyggjur af matarkostnaði því í hverjum mánuði fær forsetafjölskyldan reikning fyrir matnum og borgar fyrir hann úr eigin vasa.
Starfsfólk eldhússins lærir inn á þarfir forsetans. Því lengur sem forsetinn er við stjórnvölin, því betur þekkir starfsfólkið hann. Því fær Donald Trump til dæmis aukasósu með kvöldmatnum á meðan aðrir fá venjulegan skammt. Hann fær líka tvær kúlur af ís á meðan aðrir fá bara eina.
Það eru í raun þrjú eldhús í Hvíta húsinu. Það er aðaleldhúsið, baksturseldhús og fjölskyldueldhús.
Þegar að nýr forseti er kjörinn hefur starfsfólk eldhússins aðeins sex klukkutíma til að undirbúa komu hans. Þá er eftirlætismat þáverandi forseta fjarlægður úr búrinu og það fyllt með eftirlæti nýkjörins þjóðarleiðtoga.
Laus störf í eldhúsinu eru ekki auglýst heldur þarf að mæla með þér svo þú eigir möguleika á vinnunni.
