Donald Trump, Bandaríkjaforseti gekk að eiga sína heittelskuðu, Melaniu Trump, þann 22. janúar árið 2005. 350 gestir voru í veislunni, þar á meðal Heidi Klum, Simon Cowell og Bill og Hillary Clinton, og voru allir gestir sendir heim með litla súkkulaðiköku með gullflögum.
Ein af þessum kökum var boðin upp í Boston fyrir stuttu og var það listamaðurinn Andres Serrano sem átti hæsta boð, eða rétt tæplega 225 þúsund krónur.
Andres þessi er nútímalistamaður sem er þekktur fyrir að vinna með alls kyns líkamsvessa, svo sem saur, hland, sæði og blóð. Hans umdeildasta verk heitir Piss Christ, þar sem Jesú á krossinum er fastur inni í glerhylki sem ku vera fullt af hlandi listamannsins.
Andres hefur ekki gefið upp hvað hann ætli að gera við brúðkaupstertu Trumps, en hann myndaði forsetann árið 2004 vegna myndaseríunnar America.