Miklar frosthörkur hafa verið í Bandaríkjunum að undanförnu og hefur fólk vestan hafs sett ýmsar myndir á samfélagsmiðla til að sýna nákvæmlega hve kalt það hefur verið.
Bandaríkjamaðurinn Andrew Sietsema toppar vafalaust marga með myndum sem hann birti á Facebook. Myndirnar sýna eplalaga klaka á eplatrjám í Michigan.
Það sem gerðist í þessu tilviki var að svo kalt var að eplin urðu loks umlukin ís. Þegar að hlýnaði varð hins vegar ekki nógu hlýtt til að klakinn bráðnaði, en nógu hlýtt til að eplin inni í íshjúpnum urðu að mauki og runnu út um glufur á íshjúpnum. Það sem eftir stóð var síðan ísepli eins og sést á myndum Andrews, eða svokölluð draugaepli.
Ekki er um að ræða algenga sjón, en þó hægt að finna slík draugaepli þegar mikið frost grípur eplagarða víðs vegar um heiminn.
Svona getur náttúran verið mögnuð.