Sjónvarpskokkurinn Gary Rhodes lést í gær, 59 ára að aldri. Þetta staðfesti fjölskylda hans við Daily Mail nú í morgunsárið. Gary lést í Dúbaí, þar sem hann hefur búið síðan árið 2011. Gary skilur eftir sig eiginkonuna Jennie Rhodes og tvö börn.
„Rhodes-fjölskyldan er í molum að þurfa að tilkynna fráfall ástkærs eiginmanns, föður og bróður,“ stendur í yfirlýsingu frá fjölskyldunni. „Gary lést í gærkvöldi, þriðjudagskvöldið 26. Nóvember 2019, 59 ára að aldri, með ástkæra eiginkonu sína Jennie sér við hlið. Fjölskyldan þakkar öllum fyrir stuðninginn og biður um að einkalíf sitt sé virt að svo stöddu.“
Fjölmargir þekktir einstaklingar innan veitingageirans hafa vottað fjölskyldunni samúð sína í ljósi frétta morgunsins, þar á meðal stjörnukokkurinn Jamie Oliver. Hann birtir falleg skilaboð um Gary á Instagram-síðu sinni.
„Innilegar samúðarkveðjur til eiginkonu hans, barna, vina og fjölskyldu. Ég sendi ást og hlýju,“ skrifar hann. „Gary var stórkostlegur kokkur og frábær sendiherra breskrar matseldar. Hann var mér mikill innblástur þegar ég var ungur.“
https://www.instagram.com/p/B5XRmc3gr6v/
Þá eru flestir sammála um að Gary hafi umbreytt breskri matseld með „fágun og fjöri,“ eins og Jamie orðar það.
Kokkurinn Simon Hulstone tístir einnig samúðarkveðjum til aðstandenda Gary.
„Þvílík skínandi stjarna í breskum matarfræðum. Hvíldu vel kokkur.“
Very sad to get a message this morning from Dubai informing me of the brilliant Chef and mentor Gary Rhodes passing last night. What a shining star for British gastronomy. Rest well Chef
— Simon Hulstone (@Hulstone) November 27, 2019
Kokkurinn Daniel Clifford gerir slíkt hið sama á samfélagsmiðlum.
„Hvíl í friði,“ skrifar hann. „Þú opnaðir dyr fyrir svo marga, unga, enska kokka.“
Rest in peace a true British classic Gary Rhodes you open the door for so many young English cooks
— Daniel Clifford (@Midsummerchef) November 27, 2019
Gary vakti fyrst athygli um aldamótin 2000 og var meðal annars kynnir í þáttum eins og MasterChef og Hell‘s Kitchen. Hann skrifaði hátt í tuttugu matreiðslubækur og náði að krækja sér í fimm Michelin-stjörnur á ferlinum.