Veitingastaðamógúllinn Harry Morton er látinn, aðeins 38 ára að aldri. Harry fannst látinn á heimili sínu í Beverly Hills. Ekkert bendir til þess að andlátið hafi borið að með glæpsamlegum hætti en beðið er eftir krufningsskýrslu. Miðillinn TMZ sagði fyrstur frá andláti Harry.
Harry stofnaði veitingastaðakeðjuna Pink Taco og eru veitingastaðir keðjunnar til dæmis í Los Angeles, Chicago og Las Vegas. Þá átti Harry einnig eitt sinn næturklúbbinn Viper Room í Vestur-Hollywood.
Harry var mjög áberandi í skemmtanabransanum og hefur deitað heimsfrægar konur á borð við Demi Moore, Lindsay Lohan, Paris Hilton, Jennifer Aniston og Britney Spears.
Það má segja að veitingastaðarekstur hafi verið Harry í blóð borinn. Faðir hans, Peter Morton, var meðal stofnenda Hard Rock Café og afi hans, Arnie Morton, stofnaði veitingastaðinn Morton‘s Steakhouse. Harry lærði margt af föður sínum og í æsku vann hann á sumrin á Hard Rock-hótelinu í Las Vegas.
Harry keypti glæsilegt hús í Beverly Hills í mars á þessu ári, en húsið var eitt sinn í eigu hjónanna Elvis og Priscillu Presley. Harry greiddi rúmlega 25 milljónir dollara fyrir slotið, rúma þrjá milljarða króna.
Harry var ókvæntur og barnlaus.
