Breski verslunarrisinn Tesco hefur tekið auglýsingu með mynd af Kryddpíunni Mel B úr birtingu eftir að Kryddpían kvartaði. Um var að ræða mynd frá Brit-verðlaunahátíðinni árið 1997 þar sem Mel B sást syngja í hlébarðagalla. Í auglýsingunni var tilvísun í fræga slagarann með Spice Girls, Stop right now.
Auglýsingarnar birtust meðal annars á strætóskýlum og tók Mel B sjálf mynd af einu slíku og setti á Instagram með skilaboðunum:
„Getur framkvæmdastjóri Tesco, Dave Lewis, haft samband við mig tafarlaust. Takk fyrir.“
https://www.instagram.com/p/B4url90prVb/
Viðbrögðin létu ekki á sér standa og reiddust aðdáendur hennar mjög yfir þessu athæfi Tesco. Gengu sumir svo langt að bjóða Kryddpíunni ókeypis lögfræðiaðstoð. Svo fór að Tesco fjarlægði auglýsinguna úr herferð sinni, sem gengur út á að vísa í fræga viðburði eða manneskjur síðustu hundrað árin.
Talsmaður Tesco segir í samtali við Sky fréttastofuna að ætlunin hafi ekki verið að koma Kryddpíunni í uppnám.
„Við í Tesco erum miklir aðdáendur Mel B og vorum spennt að hafa hana í herferðinni,“ segir hann og bætir við að myndin hafi ekki verið birt í óleyfi.
„Við vorum með leyfi til að nota myndina en við hörmum að Mel B sé svona sár og því hættum við að nota myndina.“