Á fimmtudaginn gat Dion Waiters, leikmaður Miami Heat í NBA deildinni í körfubolta, ekki leikið gegn Los Angeles Lakers því hann hafði borðað of marga hlaupbangsa. Það varð til þess að það leið yfir hann og hann fékk kast. En hlaupbangsarnir, sem hann borðaði, eru ekki eins og þeir sem mörg okkar kaupa stundum úti í búð því þessir innihalda kannabis.

Andy Slater, fréttamaður Fox, skýrði frá þessu. Hann segir að þetta hafi gerst um borð í flugvél liðsins þegar hún var á leið til Los Angeles. Talsmenn Miami Heat hafa ekki viljað staðfesta þetta og heldur ekki Waiters.

Hin opinbera skýring úr herbúðum Miami Heat var að Waiters væri veikur. Hann hefur misst af níu leikjum á tímabilinu, meðal annars vegna leikbanns frá liðinu sjálfu en hann lenti í deilum við þjálfarann.