Leikkonan Melissa McCarthy sló rækilega í gegn á nýafstaðinni Golden Globe-verðlaunahátíð, þó hún hafi ekki farið heim með verðlaunagrip. Hún fékk nefnilega frábæra hugmynd sem hún framkvæmdi með góðum árangri.
Melissa ákvað að smygla samlokum með skinku og osti inn á verðlaunahátíðina, en samkvæmt Variety segir maðurinn hennar, Ben Falcone að samlokurnar hafi verið fjörutíu talsins. Samkvæmt frétt blaðsins voru allir sem fengu samlokur afskaplega þakklátir, en þetta var mikið leynimakk því stjörnurnar máttu ekki sjást kjamsa á samlokunum í beinni útsendingu.
Sigurvegarinn Olivia Coleman kom hins vegar upp um leikkonuna og þakkaði fyrir „æðislegar“ samlokur á sviðinu þegar hún tók við verðlaunum fyrir frammistöðu sína í The Favourite.
Samlokurnar umtöluðu keypti leikkonan á staðnum Joan’s On Third í Los Angeles, en í samtali við Variety segir Melissa: „Næst smygla ég pylsum.“
https://www.instagram.com/p/BsUwtFMB1PW/
Eiginmaður hennar, fyrrnefndur Ben, deildi mynd af samlokunum á Instagram þar sem hann segir að fjörutíu hafi ratað á verðlaunahátíðina en aðeins tvær hafi komið aftur heim með hjónunum. Þær slógu því rækilega í gegn.
