„Flestir myndu halda að pepperóní sé bara pepperóní en svo er aldeilis ekki. Við eyddum fjórum kvöldum bara í að smakka pepperóní til að finna hið eina rétta, fyrir utan tugi annarra áleggja í borðinu. Það var frekar fyndið að smakka sex til tíu útgáfur af pepperóní yfir daginn,“ segir Jón Gunnar Geirdal, einn af eigendum veitingastaðarins Black Box Pizzeria. Black Box opnaði í Borgartúni í Reykjavík þann 22. janúar í fyrra og fagnar því bráðum eins árs afmæli. Nú færir staðurinn út kvíarnar og opnar í Mosfellsbæ á vormánuðum.
„Það komu nýir hluthafar í félagið fyrir áramót sem gerir það að verkum að við getum stækkað hratt og örugglega. Þetta er í raun fyrsta skrefið í þeirri stækkun. Framtíðarsýnin var mjög skýr í upphafi. Hugmyndin var að opna einn stað og láta hann ganga upp og í kjölfarið opna fleiri staði. Í hópinn bættust þaulvanir veitingamenn sem varð til þess að Hvíti riddarinn í Mosfellsbæ verður Black Box, vonandi strax í mars,“ segir Jón Gunnar, en hann stofnaði staðinn ásamt Karli Viggó Vigfússyni. Þaulvönu veitingamennirnir sem bættust síðan í hópinn eru Jóhannes Stefánsson og fjölskylda í Múlakaffi og Jóhannes Ásbjörnsson, oft kenndur við Hamborgarafabrikkuna.
Jón Gunnar hlakkar til að takast á við nýjar áskoranir í Mosfellsbæ og telur að Black Box verði kærkomin nýjung í bænum.
„Það var ákveðin tragedía hvernig fór með Hvíta riddarann, þann góða stað, sem var búinn að vera þarna í mörg, mörg ár. Hann lokaði því miður og hefur staðið auður síðan. Við sáum tækifæri í þessu, en þó mikil uppbygging sé í bænum er afskaplega lítil fjölbreytni í veitingastaðaflórunni,“ segir Jón Gunnar og bætir við að hann og viðskiptafélagar sínir sé komnir með gott veganesti í reynslubankann það ár sem Black Box hefur verið starfandi í Borgartúni.
„Við vissum að hádegin yrðu sterk, sem þau eru, en umferðin hér seinnipartinn og á kvöldin hefur verið sterkari en hádegin. Það er með ólíkindum. Um helgar er síðan allt á floti og troðfullt út úr dyrum. Áður fyrr, þegar allt var lokað var Borgartúnið eins og draugabær þannig að þetta hefur komið skemmtilega á óvart,“ segir hann.
En er ekki erfitt að reka pítsastað og háma í sig pítsur daginn út og inn? Nær veitingamaðurinn að halda sér í einhverju formi, umkringdur flatbökum?
„Ég er í furðugóðu formi þrátt fyrir allt, svona miðað við að það eru smakkaðar pítsur út í eitt. Áður en pítsa fer á matseðil þarf að fullkomna hana og þá eru smakkaðar nokkrar útgáfur. Ég get ekki ímyndað mér hvað ég er búin að bíta í margar pítsasneiðar síðasta árið en þær hlaupa á þúsundum. Miðaldra menn eins og ég þurfa að halda sér í formi og það verður ekkert auðveldara með árunum,“ segir hann og hlær. „Þetta getur tekið á, en bakarinn minn er í Crossfit á hverjum morgni og ég reyni líka að hreyfa mig yfir daginn. Pítsurnar á Black Box eru líka með súrdeigsbotni og hann er léttari í magann en hefðbundið pítsadeig, þannig að ég er í furðufínu formi eftir árið.“
Það liggur beinast við að spyrja hvaða landvinningar sé planaðir fyrir Black Box eftir að staðurinn hefur náð fótfestu í Mosfellsbænum í vor.
„Við erum að skoða ýmislegt á stór Reykjavíkursvæðinu og erum með augun opin fyrir skemmtilegum tækifærum. Framtíðarpælingin er að opna fleiri Black Box-staði á næstu árum, en við viljum byggja þetta upp hratt og örugglega og ekki ana út í neitt. Sjáum til hvernig næstu mánuðir verða, en fyrst og fremst hlökkum við til að opna dyrnar fyrir Mosfellinga og bjóða þeim uppá pítsu.“