Á þessum árstíma fá margir flensu eða kvef sem er frekar hvimleitt. Margir kaupa sér ýmis lyf, hvort sem það er nefsprey eða hóstasaft, til að sporna gegn flensunni en það er hins vegar tímasóun ef marka má prófessorinn Alyn Morice.

Alyn, sem stjórnar hjarta-, æða- og öndunarfærasjúkdómadeilidinni við háskólann í Hull, segir að súkkulaði geti linað hósta mun betur en hóstasaft.

Í grein á Daily Mail vitnar Alyn í rannsókn sem sýnir fram á að lyf sem innihaldi kakó vinni betur á hósta en hefðbundið hóstasaft. Þátttakendur í rannsókninni voru 163 talsins. Þeir sem tóku inn lyf með súkkulaði náðu miklum bata á aðeins tveimur dögum.

Þetta er ekki í fyrsta sinn sem ágæti súkkulaðis er sannað í þessu samhengi. Vísindamenn við Imperial-háskólann í London komust nýverið að því að þeóbrómín, efni í kakói, virkar betur gegn hósta en hefðbundin lyf.

Vísindamenn telja að ástæða þess að kakó sé betra til að lina hósta sé sú að það er klístraðra og þykkara en hefðbundin hóstamixtúra. Þar af leiðandi myndar kakóið þykkara lag til að vernda taugaenda í hálsinum.