Facebook-notandinn Tara Renee deildi mynd sem hefur vægast sagt vakið óhug. Myndin var tekin á Subway-stað í Michigan og á henni sést starfsmaður staðarins hvíla berar fæturna á borði þar sem matur er geymdur á meðan konan talar í símann.
Myndin hefur farið eins og eldur í sinu um internetið og láta athugasemdirnar við hana ekki á sér standa.
„Oj!! Í alvöru?!?“ skrifar einn Facebook-notandi og annar bætir við: „Það er ekki hægt að afsaka þetta.“
Aðrir eru sammála um að forðast ætti þennan Subway-stað framvegis.
„Subway, þetta er algjörlega hræðilegt. Ég borða ekki á Subway og mun aldrei gera það,“ skrifar einn.
„Ég vona að hún verði rekin. Þetta er ógeðslegt,“ bætir annar við.
Eftir að myndin vakti svona mikla athygli fór heilbrigðiseftirlitið á staðinn og fann ekkert að þar. Í ummælum við fyrrnefnda Facebook-mynd er því haldið fram að konan á myndinni sé eiginkona eiganda staðarins. Hún ku hafa beðist afsökunar á hegðun sinni.