Sjónvarpsstjarnan Kelly Ripa segist ekki geta borðað eftir ketó mataræðinu eins og eiginmaður hennar, leikarinn Mark Consuelos.

„Eiginmaður minn er farinn á fullt í ketó en ég get sagt að þetta er eitthvað sem ég gæti aldrei gert,“ segir Kelly í samtali við tímaritið Us Magazine. Ástæðan fyrir því er ekki flókin.

„Ég er bara ekki með nægan sjálfsaga. Mark segir að ég sé kolvetnahámur því ég borða alltaf brauðið hans ef hann fær sér borgara. Og franskarnar. En, þið vitið, ég hreyfi mig þannig að ég má það. Ég er 48 ára og ég borða það sem mig langar að borða,“ bætir hún við.

Kelly gerir sérstaklega vel við sig seint á kvöldin.

„Ég og Mark fengum okkur alltaf samloku með hnetusmjöri og sultu fyrir svefninn. Ég veit ekki af hverju. Mér fannst þetta ekki einu sinni gott þegar ég var barn, en svona er þetta.“

Kelly og Mark hafa verið gift í 22 ár og eiga soninn Michael, 21 árs, dótturina Lola, 17 ára og soninn Joaquin, 15 ára, saman.