Stjörnubakarinn Duff Goldman, eigandi kökuverslunarinnar Charm City, gekk að eiga unnustu sína Johanna Colbry síðasta laugardag, eftir tæplega árs trúlofun. Duff er hvað þekktastur fyrir þátttöku sína í raunveruleikaþættinum Ace of Cakes á sjónvarpsstöðinni Food Network.
Duff og Johanna buðu 250 gestum í brúðkaupið sem var haldið í náttúrufræðisafninu í Los Angeles. Ekkert var til sparað í brúðkaupinu og var meðal annars búið að koma fyrir litlum húsdýragarði inni á safninu þannig að gestir gætu klappað dýrum til að stytta sér stundir.
Það voru hins vegar veitingarnar sem stálu senunni, nánar til tekið brúðkaupsterturnar sem voru alls fimm talsins. Ein þeirra vakti sérlega athygli þar sem hún var í sjávarþema og hékk úr loftinu.
Þá var einnig pretzel-bar með ýmsum sósum og alls kyns götumatur í boði. Eitt er víst – enginn fór svangur úr þessum fögnuði.