Áfengu drykkirnir sem þú biður um á bar ku segja mikið um persónuleika þinn. Þá ákvarða drykkirnir einnig hvort barþjónum líkar vel við þig eða ekki þegar þú pantar á barnum, samkvæmt nýrri könnun Alcohol.org.
Vefsíðan spurði rúmlega 260 fyrrverandi og núverandi barþjóna hvaða drykkjarpantanir þeim þættu mest pirrandi og niðurstöðurnar koma eilítið á óvart.
Á toppi þessa vafasama lista er Appletini, epla martíni sem búinn er til úr vodka og eplasafa, eplasæder, eplalíkjör eða eplakoníaki. Tæplega helmingur barþjóna sem tóku þátt í könnuninni þola ekki þennan drykk og missa álit á þeim sem hann pantar. Í öðru sæti er Jägerbomb, þegar skoti af Jägermeister er skellt ofan í glas af orkudrykk. Frosnir drykkir verma síðan þriðja sætið.
Neðar á listanum er vatn, en 23 prósent barþjóna þola ekki fólk sem pantar vatn á barnum. Nokkru neðar eru vinsælir drykkir á borð við Mojito, White Russian, Moscow Mule og Screwdriver. Eitthvað til að hafa á bak við eyrað næst þegar þú pantar á barnum.