Nú styttist í bandarísku Ofurskálina, úrslitaleikinn í ruðningi, en sýnt verður beint frá kappleiknum þann 3. febrúar næstkomandi. Það er ekki aðeins beðið eftir leiknum með mikilli eftirvæntingu heldur einnig auglýsingunum sem sýndar verða í auglýsingatímanum.

Bandarísk fyrirtæki eyða mörgum milljónum í að búa til auglýsingar sem tekið er eftir á Ofurskálinni og er þetta frægasti auglýsingatími ársins vestan hafs.

Sjá einnig: Toppa sig enn á ný með óhefðbundinni Super Bowl-auglýsingu.

Meðal auglýsinga sem sýndar verða í ár er frá Pepsi, nánar til tekið fyrir sódavatnið Bubly. Aðalhlutverk í auglýsingunni er í höndum söngvarans Michael Bublé, en í broti úr auglýsingunni sést söngvarinn merkja sér dósir af Bubly.

Brotið er frekar fyndið og lofar góðu fyrir auglýsingu í fullri lengd fyrstu helgina í febrúar.