Gamla, góða flatbakan klikkar seint, en þar sem einhverjir ætla að taka til í mataræðinu á nýju ári hafði fjölmiðillinn INSIDER samband við næringarfræðinginn Jonathan Valdez og spurði hvernig væri hægt að gera pítsu aðeins hollari. Það stóð ekki á svörunum hjá Jonathan.

Sleppið pepperóní, skinku og öðrum unnum kjötvörum

„Óhollasti parturinn af pítsu er pylsa, pepperóní og skinka ef það er notað. Þessi matvæli innihalda mikið af mettaðri fitu og natríum,“ segir hann.

Minnka líka ostinn

„Það er góð hugmynd að forðast aukaost eða skorpu sem er fyllt með osti. Hins vegar elska ég pítsu og borða hana reglulega. Maður þarf bara að fylgjast með hve oft maður borðar hana og hve mikið af henni maður lætur ofan í sig.“

Hrúgið frekar grænmeti á hana

Jonathan mælir með að setja meira grænmeti á flatbökuna fyrst að osturinn hefur minnkað.

„Að bæta grænmeti á pítsu er frábær hugmynd því þú getur enn notið bragðsins en einnig fengið næringarefni eins og trefjar, andoxunarefni, vítamín og steinefni,“ segir Jonathan. „Grænmeti hjálpa líka til við að fylla magann þannig að þá er ólíklegra að maður grípi sér aukasneið.“

Hættið í hvítu hveiti og notið heilhveiti

„Með því að skipta út hvítu hveiti fyrir heilhveiti í botninum fást næringarefni eins og B-vítamín, járn og magnesíum úr pítsunni,“ segir næringarfræðingurinn.

Prófið blómkálsbotn

Blómkálsbotn er glútenfrír og lágkolvetna, þannig að þetta er góð hugmynd fyrir þá sem passa upp á kolvetnaneyslu þessi dægrin.