Það eru eflaust margir sem hafa sett sér einhvers konar heilsutengd markmið fyrir árið 2019. Ketó-mataræðið, eða svokallað lágkolvetna fæði, hefur notið mikillar hylli síðustu mánuði, en hér er einn gómsætur blómkálsréttur fyrir þá sem ætla að byrja árið á lágkolvetna nótum.
Hráefni:
2 litlir blómkálshausar, skornir í bita
2 msk. smjör
3 hvítlauksgeirar, maukaðir
3 msk. hveiti (hér er hægt að minnka kolvetnin enn meira og nota xanthax gum)
2 bollar mjólk
55 g mjúkur rjómaostur
1 1/2 bolli rifinn cheddar ostur
salt og pipar
6 beikonsneiðar, eldaðar og muldar
1/4 bolli vorlaukur, saxaður
Aðferð:
Hitið ofninn í 175°C. Sjóðið blómkálið í þrjár mínútur í saltvatni í stórum potti. Hellið vatninu af blómkálinu og setjið það til hliðar. Bræðið smjör í stórri pönnu. Bætið hvítlauk út í og eldið í 1 mínútu. Bætið síðan hveiti við og hrærið í 2 mínútur. Bætið mjólk við og látið koma upp suðu. Bætið síðan rjómaosti saman við og hrærið vel. Takið af hitanum og hrærið 1 bolla af osti saman við og kryddið með salti og pipar. Raðið blómkálinu í eldfast mót og hellið ostasósunni yfir það. Hrærið til að blanda saman. Blandið beikoni og vorlauk saman við, en haldið eftir sirka 1 matskeið af hvoru fyrir sig. Skreytið síðan með restinni af ostinum, beikoni og vorlauk. Bakið í 30 mínútur.