„Ég get ekki lengur notið þess að vera í garðinum,“ segir hin ástralska Cilla Carden. Cilla fór í mál við nágranna sína ekki alls fyrir löngu, meðal annars í þeim tilgangi að fá þá til að hætta að grilla kjöt og fisk í garðinum.
Til að gera langa sögu stutta hafa tveir dómstólar í Perth vísað málinu frá, meðal annars á grundvelli þess að það myndi skerða lífsgæði nágranna hennar að fá ekki að grilla í garðinum. Í frétt breska blaðsins Guardian kemur fram að Carden, sem er vegan, hafi ekki gefið upp alla von og ætlar hún lengra með málið.
Carden er búsett í Girrawheen í norðurhluta Perth. Hún segir að deilurnar við nágranna hennar hafi stigmagnast og þeir séu nú farnir að reyna vísvitandi að gera henni lífið leitt.
Það er fleira en grillmaturinn sem fer í taugarnar á Carden því í stefnunni tiltók hún einnig ólykt vegna reykinga í garðinum og hávaða frá börnum nágrannanna sem hafa átt það til að leika sér í boltaleikjum í garðinum. Einn nágranni segist raunar hafa fært sitt grill og hvatt börn sín til að hætta að leika sér með körfubolta í garðinum.
Carden segist ætla að reyna að fara lengra með málið og kveðst hún tilbúin að fara dómstólaleiðina til þess.