Ný rannsókn sem birt er í Journal of the American Medical Association (JAMA) sýnir fram á að neysla sykraðra drykkja geti aukið hættu á ótímabæru andláti. Þá sýna niðurstöður einnig að hreinn ávaxtasafi sé jafnvel verri en sykraðir gosdrykkir og sykraðir drykkir almennt í þessum efnum.
Alls tóku 13,440 Bandaríkjamenn yngri en 45 ára þátt í rannsókninni. Niðurstöður hennar sýna að neysla hverrrar 350 millilítra einingu af ávaxtasafa orsakaði 24 prósent meiri hættu á ótímabæru andláti þess sem safans neytti. Hins vegar var þessi hætta aðeins ellefu prósentum meiri þegar um sykraða drykki var að ræða.
Rannsóknin var framkvæmd af vísindamönnum við Harvard-háskóla og segir í niðurstöðum að þetta snúist í raun um hvernig líkaminn meltir þann sykur sem við innbyrðum.
„Ávaxtasafar eru oftast taldir hollari kostur en sykraðir drykkir. Hins vegar innihalda þeir oft jafn mikinn sykur og jafn margar hitaeiningar og sykraðir drykkir. Þó að sykurinn í 100 prósent hreinum ávaxtasafa sé náttúrulegur en ekki viðbættur þá bregst líkaminn eins við þeim sykri og ef um viðbættan sykur væri að ræða,“ stendur í niðurstöðum rannsóknarinnar.
Vissulega getur ávaxtasafi oft innihaldið nauðsynleg næringarefni, vítamín og steinefni en hins vegar er vert að benda á að ávöxtur inniheldur um 35 prósent minna af sykri að meðaltali en ein flaska af safa.