Mikilvægum gögnum úr herbúðum McDonald’s hefur verið lekið til fjölmiðilsins Business Insider, en í gögnunum kemur í ljós að matseðill skyndibitakeðjunnar verður uppfærður í lok þessa mánaðar.
Um er að ræða breytingar á næturmatseðli McDonald’s, en frá og með 30. apríl verður ekki hægt að fá samloku með grilluðum kjúklingi, „premium“-salöt og Filet-O-Fish svo dæmi séu tekin. Þá verða beyglur og vefjur einnig teknar af næturmatseðlinum.
Matseðillinn verður því einfaldaður til muna og inniheldur til dæmis Big Mac, Quarter Pounder, nagga, franskar og barnabox eftir breytingarnar. Réttir sem verða teknir af næturmatseðlinum verða samt fáanlegir yfir daginn.
Í grein Business Insider um málið kemur fram að þessar breytingar séu gerðar til að lækka kostnað og minnka matarsóun, en einnig til að hraða þjónustu á skyndibitastöðunum.