Síðan árið 1995 hafa verið sex litir í hefðbundnum poka af M&M: brúnn, gulur, grænn, rauður, appelsínugulur og blár.

Árið 1997 setti fyrirtækið Mars, sem framleiðir M&M, upplýsingar á heimasíðu sína um hlutfall hvers litar í pokum af upprunalegu M&M-pillunum, sem sagt pillum sem eru ekki fylltar með neinu, svo sem hnetusmjöri eða hnetum. Þá voru hlutföllin á þessa leið: 30% brúnn, 20% gulur, 20% rauður, 10% appelsínugulur, 10% grænn og 10% blár. Brúnn var sem sagt algengasti liturinn.

Rúmlega áratugi síðar, eða árið 2008, var hlutföllunum breytt í eftirfarandi: 24% blár, 20% appelsínugulur, 16% grænn, 14% gulur, 13% rauður og 13% brúnn. Allt í einu var brúnn orðinn óalgengastur ásamt rauða litnum.

Einn daginn hvarf þessi tölfræði af heimasíðu Mars. Því ákvað tölfræðingurinn Rick Wicklin að taka málin í sínar hendur árið 2017. Í nokkrar vikur taldi hann M&M-pillur úr stórri krukku á kaffistofunni á skrifstofunni í hugbúnaðarfyrirtækinu þar sem hann vann. Á þessum tíma taldi Rick 712 pillur og voru hlutföllin 19.5% grænn, 18.7% appelsínugulur, 18.7% blár, 15.1% rauður, 14.5% gulur og 13.5% brúnn.

Rick ákvað í kjölfarið að hafa samband við höfuðstöðvar Mars og sýna þeim niðurstöður sínar. Þá ljóstraði upplýsingafulltrúi Mars upp að M&M-pillurnar væru framleiddar í tveimur mismunandi verksmiðjum i Bandaríkjunum – önnur í New Jersey og hin í Tennessee. Að auki kom á daginn að mismunadi væri eftir verksmiðjum hvernig litaskiptingin væri.

Mars sendi gögn á Rick sem sýndu að hans niðurstöður rímuðu við litaskiptingu í verksmiðjunni í Tennessee. Annað var uppi á teningnum í New Jersey, en þar er litahlutfallið 25% blár, 25% appelsínugulur, 12.5% grænn, 12.5% rauður, 12.5% gulur og 12.5% brúnn.

Þetta sýnir því að liturinn sem áður var algengastur, sem sagt brúnn, er nú sjaldgæfastur á öllum vígstöðum.