Stórverslunin IKEA birtir í dag heilsíðu auglýsingu í Fréttablaðinu til að auglýsa það að veitingasvið verslunarinnar er búið að ketóvæðast. Ketó-mataræðið hefur notið gríðarlegra vinsælda upp á síðkastið og virðist IKEA vera að hoppa á þann vagn.
Meðal þess sem er á ketó-matseðlinum eru lambaskankar með meðlæti á 1.095 krónur, en hefðbundinn lambaskanki með kolvetnum er á 995 krónur.
Ketóvænt lamba sirloin með meðlæti er á 1.295 krónur á meðan kolvetnarík útgáfa af réttinum er á 1.195 krónur samkvæmt heimasíðu IKEA.
Meðal annarra rétta sem hafa gengið í gegnum ketó yfirhalningu eru eggjakökur, blómkálsmús, ketókaffi og frosið brauð.