Lögreglumenn í Chicago skjóta föstum skotum á New York-búa í nýlegri Twitter-færslu. Í henni spyrja lögreglumennirnir hvernig Bandaríkjamenn ætli að fagna pítsudeginum sem er á laugardag vestan hafs.
Lögreglumennirnir birta myndir af tveimur pítsum, annars vegar pítsu í Chicago-anda sem er ansi þykk og síðan pítsu með þunnum botni.
„Báðir kostir eru betri en pítsasneið í New York,“ skrifa þeir svo.
Lögreglumenn í New York voru ekki lengi að svara þessu með öðru hörðu skoti.
„Við þekkjum pítsusneiðina til hægri en hvað er þetta til vinstri? Er pasta í því?“ spyrja lögreglumennirnir.
We recognize the slice of pizza on the right, but what’s the one on the left? Is there pasta in it? https://t.co/uHo9a7No2w
— NYPD NEWS (@NYPDnews) February 6, 2019
Viðbrögð tístara láta ekki á sér standa og virðast flestir vera sammála um að Chicago-pítsa sé ansi furðuleg.
„Chicago „pítsa“ er ekkert lík pítsu (sérstaklega pítsu í New York). Þetta er frekar eins og eplabaka með ítölskum hráefnum,“ tístir einn.
„ÞETTA ER EKKI PÍTSA. Það þýðir ekki að Chicago-baka sé slæm en hún er ekki PÍTSA! Þetta er kássa með tómötum og osti fjandinn hafi það,“ tístir annar.
Einn netverji leikur sér að orðum þar sem rifrildið er á milli lögreglumanna.
„Þetta er glæpur gegn pítsu! Handtakið hana!“