Paul Dawson fór með kærustu sinni, Laurencia Wood, og nýfæddum syni þeirra, Ben, út að borða á TGI Friday’s í heimabæ sínum, Stockton fyrir stuttu. Heimsóknin tók óvænta stefnu og fann Ben sig knúinn til að skrifa um það á Facebook.
Í færslu á samfélagsmiðlinum sagðist Paul hafa tekið Ben í arma sína og að barnið hafi byrjað að sjúga hnúa föður síns. Hins vegar hafi nýbakaði faðirinn gert sér grein fyrir örstuttu síðar að hann var nýbúinn að gúffa í sig kjúklingavængjum með afar sterkri sósu, svokallaðri „hot sauce“.
„Fimm daga gömlum börnum finnst greinilega ekki gott þegar að feður þeirra reka fingur upp í munn þeirra þegar þeir eru nýbúnir að borða bragðsterka vængi,“ skrifaði Paul í færslunni. „Óafvitandi auðvitað,“ bætti hann við.
Þessi saklausa færsla vatt hins vegar upp á sig og nokkrum dögum síðar komst Paul í uppnám þegar að lögregluþjónar bönkuðu á dyr hans og spurðu hvort hann hefði verið að gefa nýfædda barni sínu „hot sauce.“
„Þetta kom mér í uppnám. Ég gekk í burtu og sagði: Ég ætla ekki einu sinni að tala við ykkur,“ segir Paul í samtali við Sky News.
„Þetta átti að vera gleðitími. Ég tók nokkra daga í frí til að eyða með kærustu minni og syni. Þetta eyðilagði það sem átti að vera hugguleg vika hjá okkur saman. Ég hef ekki verið beðinn afsökunar,“ bætir hann við.
Paul fékk síðar að vita að einhver hefði tilkynnt færslu hans á Facebook til lögreglunnar.
„Að fara frá því að lenda í fyndnu atviki í að fá lögregluna heim til mín var áfall, svo vægt sé til orða tekið.“