Við á matarvefnum fáum reglulega spurningar frá lesendum sem við fögnum mjög. Ein af spurningunum sem við höfum fengið úr nokkrum áttum er hvort sé í lagi að frysta rjóma. Virkilega góð spurning, enda oft afgangur af rjóma sem næst ekki að nýta þá og þegar.
Samkvæmt Leiðbeiningastöð heimilanna er í góðu lagi að frysta óþeyttan rjóma.
„Hann er best að frysta í umbúðunum. Öruggast að hafa hann nýjan. Látinn þiðna í kæliskáp en ekki að fullu ef á að þeyta hann því þá vill hann verða kornóttur,“ stendur á heimasíðu stöðvarinnar.
Ef er hins vegar búið að þeyta rjómann þá er heldur ekkert mál að frysta hann. Settu hann einfaldlega í gott ílát og inn í frysti. Þegar hann er síðan tekinn úr frystinum er gott að láta hann standa í 10 til 20 mínútur við stofuhita áður en hann er borinn fram.
Sumir ganga svo langt að sprauta litlar dúllur af þeyttum rjóma á smjörpappír til að eiga í kakó eða kaffi. Þá eru dúllurnar frystar á smjörpappírsklæddri plötu og síðan raðað í ílát þegar þær eru frosnar í gegn.