Stórverslunin Costco er gríðarlega vinsæl á Íslandi og hefur fólk til dæmis fellt hugi saman eftir kynni í vöruhúsinu. Það er einmitt raunin með Margot Schein og Julian Parris frá San Diego í Bandaríkjunum. Þau hittust fyrst á veitingastað Costco. Hann fékk sér pylsu, hún fékk sér pítsasneið og upp frá því voru þau óaðskiljanleg.
Það kom því ekkert annað til greina þegar þau ákváðu að ganga í það heilaga en að láta gefa sig saman í Costco-versluninni í hverfinu Mission Valley í San Diego – þar sem þau hittust fyrst. Þau búa nú í Norður-Karolínu en flugu alla leið til San Diego til að innsigla ástina í Costco, innan um hundruði vörubretta af risavöxnum pakkningum.
„Við eigum svo margt sameiginlegt en Costco er það fyrsta sem við áttum sameiginlegt,“ segir Margot í samtali við TODAY Food.
Fjölskylda og vinir parsins voru viðstaddir athöfnina í miðri Costco-versluninni, en starfsmenn fengu einnig að taka þátt í þessum gleðidegi.
„Það er passandi að þessar tvær hagsýnu manneskjur sem hittust fyrst hér og að áhugi þeirra á gæðavöru á góðu verði og ódýrum pylsum hafi dregið þau saman,“ segir manneskjan sem gaf þau saman, sem er einnig náinn vinur parsins.
Margot og Julian ákváðu að hafa Harry Potter-þema í brúðkaupinu, en brúðurin klæddist skarlatsrauðum kjól í takt við Gryffindor House-litina. Þá var brúðarvöndurinn búinn til úr blaðsíðum úr skáldsögum J. K. Rowling. Brúðguminn kæddist bláu og brons til að heiðra Ravenclaw.
Áður en Margot og Julian hittust fyrst í eigin persónu tengdu þau á stefnumótaforritinu OKCupid. Margot sendi honum skilaboð því hún sá að listinn hans yfir frábæra staði fyrir stefnumót innihélt Costco. Þá ákváðu þau að hittast í versluninni með innkaupalistana sína meðferðis. Stefnumótið gekk svo vel að þau fóru rakleiðis á kaffihús og héldu stefnumótinu áfram.
„Ég man eftir því hvernig við röltum um gangana og hvernig ég gjörsamlega gleymdi flestu á listanum mínum því ég gat ekki tekið augun af þér,“ sagði Julian í brúðkaupsheitum sínum.
Það þarf varla að taka það fram að veitingarnar í brúðkaupinu voru allar úr Costco.
