Á Instagram og Snapchat er aragrúi af fólki sem birtir matarmyndir og uppskriftir fyrir fylgjendur sína. Mia Richardson, tvítug stúlka frá Bretlandi, er ein af þeim. Hún birti hins vegar mynd á Instagram-sögu sinni á dögunum sem hefur vakið mikinn usla.
Mia birti mynd af rétt sem hún var að elda og skrifaði við að þetta væri heimagerður, taílenskur karríréttur. Einn af fylgjendum hennar rak hins vegar augun í svolítið á myndinni, nefnilega umbúðir utan af búðarkeyptum karrírétt.
Fylgjandinn deildi skjáskoti af mynd Miu og skrifaði einfaldlega:
„Instagram í hnotskurn.“
Myndinni hefur verið deilt mjög oft en Mia segir í samtali við Mirror að þetta hafi eingöngu verið grín. Hún trúir því jafnframt ekki hve mikla athygli myndin hefur fengið.
„Ég er oft kaldhæðin á Instagram og tek mig ekki of alvarlega. Þetta var bara grín. Ég er móðguð að fólki finnist ég vera heimsk,“ segir Mia, sem vinnur sem einkaþjálfari í London.
„Sem betur fer get ég hlegið að sjálfri mér. Ég held að það séu margir sem tækju svona lagað nærri sér. Þetta sýnir manni að fólk sem maður þekkir ekki einu sinni getur tekið mynd og gert eitthvað úr henni.“
