Cyprien Verseux er jökla- og stjörnulíffræðingur, sem er nú með aðsetur á Suðurskautslandinu. Hann vinnur að rannsóknum í Concordia-stöðinni, sem er án efa einn afskekktasti staður jarðar.
Cyprien nýtir stundir á milli stríða með því að blogga um líf sitt á þessum afskekkta stað og hvernig einföldustu hlutir geta orðið afar flóknir – eins og að elda mat.
Í nágrenni Concordia-stöðvarinnar er nefnilega um 70°C frost yfir vetrartímann, svo kalt að bakteríur þrífast ekki einu sinni þar. Níu mánuði ársins er hvorki hægt að komast til eða frá stöðinni – það er einfaldlega það mikill kuldi að ekki er hægt að nýta sér farartæki.
Cyprien datt í hug einn daginn að bregða sér út fyrir og reyna að elda undir berum himni. Hann náði þessum makalausu myndum af eldamennsku í nístingskulda og eru þær vægast sagt magnaðar.
