Konungsfólkið í Buckingham-höll auglýsir nú eftir aðstoðarkokki í hið konunglega eldhús. Leitað er eftir starfsmanni í fulla vinnu sem vinnur fimm daga vikunnar, bæði í höllinni og á öðrum konunglegum setrum.
Hlutverk aðstoðarkokksins er að þróa rétti sem bornir eru fram við hin ýmsu tilefni sem og að fylgjast með vörubirgðum í hinu konunglega búri.
Þá vinnur aðstoðarkokkurinn einnig náið með yfirkokkinum að hinum ýmsu verkefnum í eldhúsinu frá degi til dags og þarf að vera reiðubúinn að ferðast utan Lundúnasvæðisins í vinnunni. Þeir sem sækja um þurfa að hafa yfirgripsmikla þekkingu á mat, vera menntaðir í klassískri, franskri matargerð og búa yfir ríkri skipulagshæfni. Þá þarf aðstoðarkokkurinn einnig að hafa reynslu af því að þróa matseðla fyrir stóra hópa.
Það hefur áður komið fram að konungsfólk má ekki borða hvítlauk til að forðast andfýlu, þannig að þeir sem sækja um þurfa að aðlaga sig að því.
Engin laun eru tiltekin, en ef aðstoðarkokkurinn vill getur hann verið búsettur í Buckingham-höll. Ef aðstoðarkokkurinn velur það eru launin hans lækkuð í samræmi við það.
Með því að smella hér er hægt að sækja um starfið, en umsóknarfrestur er til 19. október.