Lúxus bókunarfyrirtækið Small Luxury Hotels of The World hefur tekið saman bestu og mögnuðustu staðina í heiminum til að setjast niður að snæðingi.
Allt frá Sahara-eyðimörkinni til norskrar sveitasælu, hér eru nokkrir af þessum ótrúlegu stöðum.
Kristiania Lech-hótelið í Austurríki býður skíðafólki í rómantíska lautarferð í snjónum. Litríkir púðar, hlý teppi og kertaljós eru innifalin, og að sjálfsögðu líka lúxus snarl og kampavín.
Á Maldíve-eyjum er búið að koma fyrir veitingastað í sjónum við hótelið Baros Maldives. Veitingastaðagestir komast á staðinn á bát og geta sötrað kampavín við fallegt sólarlag. Sjö kokkar eru til reiðu til að matreiða kræsingar fyrir gestina, svo sem foie gras, kjötmeti og sushi.
Dar Ahlam í Ouarzazate býður gestum uppá óviðjafnanlega kvöldstund í Sahara-eyðimörkinni. Þjónar leiða gesti að borðinu og er leiðin upplýst með fjölda lukta. Eftir kvöldmat geta gestir síðan gist í tjaldi stutt frá.
Michelin-stjörnukokkurinn Fabien Beaufour vippar upp lúxusmáltíð í fallegum skógi á vegum Domaine Des Etangs. Fabien býður upp á kjötmeti og grænmeti eldað yfir opnum eldi.
Gestir Hulbert House hafa þann möguleika að bóka ferð í Fiordland-þjóðgarðinn. Gestir ferðast með þyrlu upp á fjallstind og síðan í siglingu þar sem boðið er uppá alls kyns sjávarfang. Eftir matinn geta gestir farið um borð í eins konar kafbát og skoðað lífið í sjónum.
Gestir Elite Spring Villas í Quanzhou í Kína geta komið sér fyrir í rólegum garði við heitan hver og drukkið te beint úr heitu uppsprettunni. Sex mismunandi tehverir eru á staðnum, til dæmis með grænu og svörtu tei sem á að vera heilsubætandi.
Þeir sem gista á Storfjord-hótelinu í Noregi geta snætt með útsýni yfir eitt lengsta fjörð Noregs og fallegan fjallagarð. Á meðan geta þeir gætt sér á réttum úr héraði sem eldaðir eru á gamla mátann.
Hótel Ka‘ana Resort í San Ignacio í Belís býður gestum upp á mat sem Majar elduðu og eru kræsingarnar matreiddar í ekta ofni frá tímum Maja.