Bakaríið Chip NYC í New York-borg vestan hafs er gríðarlega vinsælt, en sérstaða bakarísins er sú að þar eru eingöngu seldar smákökur.
En þetta eru sko engar venjulegar smákökur, eins og sést á Instagram-síðu bakarísins. Raunar telja margir að Chip NYC selji bestu smákökur í Bandaríkjunum, jafnvel í heiminum.
Fjölmargar tegundir eru í boði á hverjum degi og ættu flestir að finna eitthvað við hæfi, hvort sem það er hefðbundin súkkulaðibitakaka, samlokukaka fyllt með ís, haframjöls- og eplakaka eða kaka með blautri karamellu í miðjunni.
Það er hugsanlega ekki réttnefni að kalla þetta smákökur því bakkelsið er ansi stórt, enda kökurnar mótaðar með stórri ísskeið áður en þær fara inn í ofninn.
Og þó Chip NYC sé óraveg í burtu þá er ekkert að því að láta sig dreyma.