Okkur lék því forvitni að vita hver svindlmatur íslenskra Crossfit-stjarna væri, en þar kennir vægast sagt ýmissa grasa.
„Ég leyfi mér bragðaref einstöku sinnum,“ segir Þuríður Erla Helgadóttir sem hefur vakið mikla athygli í crossfit-heiminum síðan hún tók þátt í fyrstu CrossFit-leikunum fyrir nokkrum árum. „Mér finnst geggjað gott að setja bláber, pekanhnetur og kókos í bragðarefinn, en ef ég vil bæta við nammi þá fæ ég mér bláber, hnetusmjör og Þrist,“ bætir hún við. „Annars elska ég að fá mér bláber eða ávexti með rjóma þegar mig langar í eitthvað gott.“
Þuríður segist ekki beint fylgja þessu hugtaki um svindldaga, heldur reynir að hlusta frekar á líkamann.
„Ég leyfi mér að fá það sem mig langar í þegar mig langar í það, en oftast langar mig frekar að vera holl og borða hollt.“
„Minn svindlmatur hefur alltaf verið pítsa og kemur örugglega alltaf til með að vera pítsa,“ segir hreystimennið Árni Björn Kristjánsson sem hefur náð góðum árangri í crossfit, bæði hér heima og erlendis, síðustu ár.
„Þar sem ég er vegan þá passa ég að hafa nóg af grænmeti á pítsunni og stundum set ég oumph eða seitan á hana líka. Þar sem ég mæli allt sem ég borða, þá reyni ég samt alltaf að láta allan svindlmat falla inn í þann kaloríufjölda sem ég borða dagsdaglega,“ segir Árni og bætir við að pítsuátið sé mikilvægur partur af fjölskyldulífinu.
„Það hefur verið hefð síðustu ár að gera pítsu alltaf á föstudögum og þá hittumst við fjölskyldan og gerum heimagerða pítsu saman. Það er tími sem okkur þykir mjög vænt um. En ef við bökum ekki pítsuna sjálf þá pöntum við hana hjá Íslensku flatbökunni. Þeir eru einfaldlega með langbestu veganpítsurnar.“
Eik Gylfadóttir vinnur sem sjúkra- og einkaþjálfari í Sameinuðu arabísku furstadæmunum. Hún hefur æft crossfit af kappi síðustu árin og segir þetta áhugamál afar tímafrekt. Hún hefur náð góðum árangri í sportinu, en svindlmaturinn hennar er vægast sagt sjúklega girnilegur.
„Svindlmaturinn minn er klárlega góður hamborgari um helgar og einstaka sinnum mjólkurhristingur. Uppáhaldsstaðurinn minn er Black Tap í Dúbaí,“ segir Eik, en hægt er að gleyma sér á Instagram-síðu téðs veitingastaðar.
„Ég elska mjög mikið að fá mér svindlmáltíð en minn fyrsti valkostur er örugglega Box Master á KFC með frönskum og heitri, brúnni sósu yfir. Ég læt það eftir mér þegar mér finnst ég eiga það skilið,“ segir Björgvin Karl Guðmundsson sem æfði fimleika og knattspyrnu áður en hann fann sig í crossfit, með góðum árangri. Eftir áralangan íþróttaferil segist hann hafa mikla sjálfsstjórn þegar kemur að mat.
„Ég er ekki með neinn sérstakan svindldag en ég hef þó mikla stjórn á sjálfum mér.“
Ofurfyrirsætan Cindy Crawford fær sér ís, súkkulaði og kokteil þegar hún vill gera vel við sig.
Leikkonan Anna Faris er mikill sælkeri og fær sér annaðhvort ostborgara, pítsu, pasta, ost, ostaköku eða ís þegar hún sukkar.
Sjónvarpsstjarnan Ryan Seacrest er, eins og Eik, yfir sig hrifinn af mjólkurhristingum. „Minn mjólkurhristingur, minn svindldagur,“ skrifaði hann eitt sinn á Instagram.
Raunveruleikastjarnan Kim Kardashian býr til sinn hristing heima með því að blanda nokkrum kúlum af ís saman við Oreo-kex.
Leikkonan Gwyneth Paltrow er alræmdur detox-ari og reynir að sneiða unna matvöru alveg úr mataræðinu. Hún nær hins vegar ekki að hemja sig þegar franskar eru annars vegar.
Svo er það leikarinn og þúsundþjalasmiðurinn Dwayne Johnson, The Rock, sem gúffar í sig fjalli af sushi og smákökum á svindldegi.