Alþjóðlegi kampavínsdagurinn 2018 er núna á föstudaginn, 19. október og eru þeir sem ætla að gera vel við sig og fá sér kampavín hvattir til að nota alþjóðlega kassamerkið #champagneday á samfélagsmiðlum.

Haldið er upp á daginn um allan heim, með ýmsum kampavínshátíðum og er Ísland engin undantekning. Kröst í mathöllinni á Hlemmi tekur til að mynda þátt í deginum í annað sinn og býður upp á kampavínssmökkun alla helgina. Þeir sem ákveða að skella sér geta prófað fjögur, ólík kampavín frá mismunandi svæðum Champagne-héraðsins í Frakklandi fyrir 3500 krónur. Þeir sem þekkja sitt kampavín vita að þessi lúxusdrykkur er aðeins framleiddur í Champagne-héraðinu.

Kampavínin sem verða í boði í smökkuninni eru Blanc de Blanc frá Laherte Fréres, rósakampavínið Rosé de Saignée frá Larmandier Bernier, hið fornfræga Spéciale Cuvée frá Bollinger og hið ofurþurra Brut Nature frá Drappier.

Hér gefst áhugamönnum um kampavín tækifæri til að prufa sig áfram með drykkinn og finna hvaða tegund hentar bragðlaukunum best.