Sérstakt Hello Kitty-kaffihús opnaði í Irvine í Kaliforníu þann 14. september síðastliðinn og hefur nú þegar vakið athygli heimsins. Er þetta fyrsta kaffihúsið sem er tileinkað teiknimyndapersónunni Hello Kitty í Bandaríkjunum.

Á kaffihúsinu er sætapláss fyrir allt að tólf manns og er til dæmis hægt að gæða sér á sérbökuðum, litlum kleinuhringjum eða litlum kökum sem líta út eins og Sanrio-karakterar, en Sanrio er fyrirtækið á bak við Hello Kitty.

Auðvitað er gjafaverslun í kaffihúsinu og til dæmis hægt að kaupa sér Hello Kitty-krús eða fallega spöng með slaufu í anda kisunnar frægu.

Svo eru það hvítu veggirnir á kaffihúsinu sem eru skreyttir einstökum Hello Kitty-listaverkum sem voru sérstaklega búin til fyrir kaffihúsið. Talandi um fullkominn vettvang fyrir Instagram-myndaflóð.

Á kaffihúsinu er líka sérstakt slaufuherbergi, en til að komast þar inn þarf að bóka borð. Síðdegis er boðið upp á testund í slaufuherberginu sem kostar um 6000 krónur á mann. Þá er boðið upp á alls kyns ávexti, samlokur og sætindi. Einnig er boðið upp á gríðarlegt úrval af tei.

Að kvöldi til breytist slaufuherbergið í kokteilbar fyrir 21 árs og eldri og einnig þarf að bóka borð í þá gleðistund. Að sjálfsögðu eru kokteilarnir í anda Hello Kitty og einn af þeim er meira að segja borinn fram með Hello Kitty-ísmola.

Þeir sem eiga leið um Irvine í Kaliforníu geta bókað borð á Hello Kitty-kaffihúsinu hér.