Stóllinn Skata er fyrsti formbeygði stóllinn framleiddur á Íslandi og í raun elsti stóll sem framleiddur var hér á landi. Hönnuður Skötunnar er Halldór Hjálmarsson, húsgagna- og innanhússarkitekt (1927-2010), sem m.a. hannaði kaffihúsið Mokka. Hann hafði nýlokið námi sínu í Kaupmannahöfn og hrifist mjög af Maurnum eftir Arne Jacobsen, og vildi þróa sambærilegan íslenskan stól úr formbeygðum krossvið, sem þá var tiltölulega ný aðferð og algerlega óþekkt hér á landi.
Skötustóllin náði fljótt töluverðri útbreyðslu, enda alhliða stóll, sem bæði hentaði á stofnanir og heimili. Stuttu seinna bættist stóllinn Þórshamar við, einnig úr formbeygðum krossvið, en með stærra baki. Framleiðslan lagðist síðan af 1973, en hófst að nýju 2008, og eru báðir stólarnir nú fáanlegir í ýmsum úfærslum og litum.
Þó dönsku árhrifin séu mjög sterk, og ekki síst frá stólum Arne Jacobsen, þá stendur Skötustóllin sterkum fótum sem sjálfstæð íslensk hönnun, þar sem blandað er saman nýstárlegum tæknilausnum og ljóðrænum tilvísunum til náttúrunnar.
Festingarnar voru algjör nýjung og minntu auk þess á egg skötufisksins. Sama má segja um hið skötulagaða bak, sem fyrst og fremst var hugsað til þess að ná fram sveigjanleika og hámarsstyrk, án þess þó að þyngja stólinn, en fyrstu stólar Arne Jacobsen áttu það til að brotna um hálsinn, þó síðar hafi verið bætt úr því með nýrri tækni.
Skötustóllinn fagnar 60 ára afmæli á þessu ári og framleidd verða tölusett eintök af völdum útgáfum. Bæði þeim nýjustu og einnig í sígildri glærri eik, en slíkir stólar prýddu m.a. lögreglustöðina í nýjustu Ófærðarþáttunum.
Nánari upplýsingar fást á www.skata.is eða info@skata.is