Íþróttabandalag Reykjavíkur, frjálsíþróttadeildir Ármanns, Fjölnis og ÍR og Powerade standa saman að mótaröð hlaupa í sumar sem nefnist Powerade sumarhlaupin. Mótaröðin var fyrst sett á laggirnar sumarið 2009 og er þetta því í ellefta sinn sem hún er haldin.
Arnar og María voru á frábærum tíma
Fyrsta hlaupið, Víðavangshlaup ÍR, fór fram sumardaginn fyrsta 25. apríl og voru þátttakendur um 700 talsins. Víðavangshlaup ÍR var fyrst haldið sumardaginn fyrsta árið 1916 og á enginn íþróttaviðburður hér á landi jafn langa samfellda sögu. „Sigurvegarar í 5 km hlaupinu í ár og jafnframt Íslandsmeistarar í 5 km hlaupi 2019 voru Arnar Pétursson úr ÍR á tímanum 15:52 og María Birkisdóttir úr FH á tímanum 17:59,“ segir Anna Lilja Sigurðardóttir, upplýsinga- og samskiptastjóri Íþróttabandalags Reykjavíkur.
Íslandsmótið í 10 km götuhlaupi fór fram í gær í blíðskaparveðri
Fjölnishlaupið er annað hlaupið í mótaröðinni og fór fram í gær, fimmtudaginn 30. maí, í 31. sinn. Keppt var í 10 km og 5 km hlaupi og svo 1,4 km skemmtiskokki. „Fjölnishlaupið var jafnframt Íslandsmótið í 10 km götuhlaupi í ár, en hlaupið gildir einnig til stiga í mótaröðinni,“ segir Anna.
Úrslit voru kynnt skömmu fyrir hádegi í gær. Sigurvegarar í 10 km Fjölnishlaupinu voru þau Sigþóra Brynja Kristjánsdóttir, UFA Eyrarskokk, á tímanum 00:39:29 og Þórólfur Ingi Þórsson, ÍR, sem kláraði hlaupið á 00:33:56.
Ört vaxandi Miðnæturhlaup Suzuki
Þriðja Powerade sumarhlaupið, Miðnæturhlaup Suzuki, verður svo haldið þann 20. júní í Laugardalnum og verður keppt í 21,1 km hálfu maraþoni, 10 km og svo 5 km hlaupi. „Þar sem boðið er upp á þrjár vegalengdir í Miðnæturhlaupi Suzuki hentar það fyrir fjölbreytt getustig og er algengt að fjölskyldur og vinahópar fari saman í hlaupið. Hálfmaraþonið og 10 km hlaupið er ræst klukkan 21.00 og 5 km hlaupið klukkan 21.20 en það er 10 km hlaupið sem gildir til stiga í stigakeppni Powerade sumarhlaupanna.“
Að vöndu endar hlaupið rétt fyrir miðnætti. Að hlaupi loknu er öllum þátttakendum boðið í sund í Laugardalslaug og er hægt að svamla í lauginni eða slaka á pottunum fram yfir miðnætti. Fjölskyldu- og húsdýragarðurinn verður einnig opinn fram yfir miðnætti þennan dag og því tilvalið að taka börnin með og eiga skemmtilega samverustund á björtu sumarkvöldi í Laugardalnum.
„Þetta er í 27. sinn sem Miðnæturhlaupið fer fram og hefur verið töluverð aukning á keppendum undanfarin ár. Árið 2018 var sett nýtt þátttökumet í hlaupinu en þá tóku 2.857 þátt. Um 40% þátttakenda í Miðnæturhlaupinu í fyrra komu erlendis frá og voru af 44 mismunandi þjóðernum, flestir frá Bandaríkjunum, Bretlandi og Kanada,“ segir Anna.
Breyttar leiðir
Vegna vaxandi fjölda þátttakenda í hlaupinu verður hlaupaleiðin í hálfmaraþoni og 10 km hlaupinu örlítið breytt. Í stað þess að hlaupa á göngubrú yfir Miklubraut verður hlaupið á brúnni sem tengir Skeiðarvog og Réttarholtsveg. Síðan verður hlaupið austur Sogaveg, niður Bústaðaveg og þaðan inn í Elliðaárdal. Göngubrúin var orðin alltof þröng fyrir þennan mikla fjölda hlaupara og verður mikill munur fyrir þá að fara þessa nýju leið.
Allar upplýsingar um næstu Powerade sumarhlaup, stöðuna í stigakeppninni o.fl. má finna á www.sumarhlaupin.is.
