Sundlaugin á Bolungarvík, Musteri vatns og vellíðunar, er notaleg innisundlaug. Á útisvæðinu má finna tvo heita potta, annar er 39°C heitur nuddpottur og hinn er 41°C. Einnig er vatnsrennibraut sem býður upp á fyrirtaks salíbunur, kaldur pottur fyrir hörkupésana og rúmgóð vaðlaug með bunusvepp. Í tengslum við sundlaugina er afar notaleg baðstofa með eimbaði og góðri hvíldaraðstöðu.

Svo miklu meira en bara sundlaug

Í Musteri vatns og vellíðunar er alltaf nóg um að vera. Yfir páskana verður í boði fjöldinn allur af skemmtilegum viðburðum, bæði við laugarbakkann og í íþróttahúsinu.

„Núna stendur yfir stórskemmtileg handverks-, ljósmynda- og málverkasýning frá Bolvíkingum og mun hún standa yfir alla páskana og lengur,“ segir Magnús Már Jakobsson hjá Musterinu.

„Einnig verðum við með leiki í boði í íþróttahúsinu fyrir börn og foreldra á opnunartíma sundlaugarinnar, allt frá skírdegi (fimmtudegi) til annars í páskum (mánudags). Þetta verður alveg stórskemmtilegt og kostar 700 krónur fyrir fjölskylduna hvern dag.“

Aldrei fór ég norður

„Einnig verða fleiri skemmtilegir viðburðir í gangi og á föstudaginn langa verða tónleikar á sundlaugarbakkanum frá kl. 16–18. Heimafólk skemmtir þá þeim sem fóru suður á Ísafjörð en snúa svo aftur í víkina,“ segir Magnús.

Dagskrá yfir páskana

Opið er frá 10–18 alla páskana.

Það eru allir velkomnir í Sundlaug Bolungarvíkur um páskahelgina!

Höfðastígur 1, 415 Bolungarvík

Sími: 456-7381

Netpóstur: sundlaug@bolungarvik.is