Í Listasafninu á Akureyri kennir ýmissa grasa yfir páskana. Safnið er glæsilegt og standa nú yfir átta fjölbreyttar sýningar þar sem barnamenning, grasrót, hefðin og menningarsagan mætast á óhefðbundinn máta. „Listamennirnir eru ólíkir og ættu allir, börn sem fullorðnir, að finna eitthvað sem heillar þá. Sýningarnar velta ýmist upp tilvistarlegum spurningum, sýna áhorfendur í spéspegli, fræða þá um himingeiminn, eru ljóðrænar eða ævintýralegar. Ég mæli eindregið með að fólk skelli sér til Akureyrar yfir páskana og baði sig í listum og menningu í Listasafninu á Akureyri,“ segir Hlynur Hallsson safnstjóri.
Áttir/Directions er yfirgripsmikil einkasýning á hljóðverkum og myndbandsverki Tuma Magnússonar. „Þróun ferils Tuma er áhugaverð. Í byrjun notaði hann fundna hluti, ljósmyndir, teikningar og 8 millimetra kvikmyndir í verk sín. Næst málaði hann í hlutbundnum stíl uns hann fór að vinna með hugmyndina um málverk fremur en málverkið í hefðbundnum skilningi. Í lok 9. áratugarins voru hugmyndirnar tími og rými orðnar eitt aðalviðfangsefni verkanna. Rannsóknir Tuma héldu svo áfram í formi innsetninga, ljósmyndaverka og vídeó-/hljóðinnsetninga.“
SuperBlack er sýning á málverkum Kristínar Gunnlaugsdóttur og leirverkum Margrétar Jónsdóttur. Verkin tengjast í gegnum tilvistarlegt tóm og spurningar um stöðu mannsins gagnvart náttúrunni.
Verk Margrétar velta upp spurningunni um hvort við færum betur með náttúruna ef við sæjum hana sem mannslíkama. Í verkum Kristínar skiptast á gáski glimmersins og alvarlegur undirtónn hauskúpunnar og hnignunarinnar.
Sköpun bernskunnar 2019 er stór sýning á verkum leikskóla- og grunnskólabarna á aldrinum 5–16 ára sem unnin eru með listamönnunum Rósu Kristínu Júlíusdóttur og Kristni E. Hrafnssyni. Hér mætast skúlptúrar, teikningar, málverk, smáhlutir og þátttökuverk í þemanu heimurinn og geimurinn.
Leikreglur / Rules of Play / Règle du Jeu er sýning á einstökum ljósmyndaverkum og vídeóverkum finnsku listakonunnar Elinu Brotherus. „Sýningin hlaut Carte blanche PMU-verðlaunin og var fyrst sýnd í Centre Pompidou 2017. Sýningin er sett upp í samstarfi við Listasafn Íslands. Við erum stolt að sýna þessi verk hér á Akureyri. Þetta er sýning sem enginn listunnandi má láta framhjá sér fara,“ segir Hlynur.
Hugmyndir er ævintýraleg sýning á verkum Hjördísar Frímann og Magnúsar Helgasonar. Leikur og gleði með fjölbreyttum tilvísunum einkenna verkin og saman skapa þau spennandi sýningu sem auðgar og eflir ímyndunarafl barna á öllum aldri.
Úrval er sýning á völdum verkum úr safneign Listasafnsins á Akureyri. „Elsta verkið er frá fyrri hluta síðustu aldar og það yngsta er tveggja ára. Listamennirnir eiga flestir rætur að rekja til Akureyrar eða Eyjafjarðar. Listasafnið á yfir 700 verk og við val á verkunum var fjölbreytni og kynjajöfnun höfð að leiðarljósi. Meirihluti safneignarinnar eru verk eftir karlmenn en þó vekur athygli að verkum eftir konur fjölgar þegar nær okkur dregur í tíma.“
Frá Kaupfélagsgili til Listagils er sýning unnin í samstarfi við Minjasafnið á Akureyri. „Með ljósmyndum og textum er kynnt fyrir áhorfendum það sem var í Gilinu áður en hér var Listagil með listasafn, Deigluna, myndlistaskóla, vinnustofur, sýningarsali, veitingastaði og íbúðir, en staðurinn á mikilvægan þátt í atvinnusögu Akureyrar. Við vildum votta fortíðinni, sem Listasafnið byggir á, virðingu og tengja gesti safnsins við söguna.“
Vídeóvinda er stórskemmtilegt verk úr smiðju Haraldar Karlssonar. Verkið er byggt á vídeóverkinu Warp eftir íslensku listakonuna og frumkvöðulinn Steinu Vasulku. Notast er við 25 ára forrit, Image-ine, sem hollenski forritarinn Tom Demeyer vann með Steinu. „Við vildum bjóða börnum upp á skemmtilega og óhefðbundna upplifun en verkið sýnir áhorfandann í spéspegli, líkt og í speglagarði í tívolí.“ Vídeóvindan er sett upp með stuðningi verkefnisins List fyrir alla í samstarfi við Listasafn Íslands.
Skúlptúrverk Aðalheiðar Eysteinsdóttur, Hugleiðing um orku, má svo sjá úti á svölum listasafnsins þar sem einnig er gott útsýni yfir Pollinn, Akureyrarkirkju og Listagilið.
Opið er í Listasafninu á Akureyri alla daga og yfir alla páskana frá kl. 12–17.
Gil Kaffihús er opið kl. 9–17, en laugardaga er opið til kl. 17.30.
Kaupvangsstræti 8–12, Akureyri.
Sími: 461-2610.
www.listak.is