„Í 12 ár höfum við í Vídalínskirkju í Garðabæ blásið í lúðra á konudaginn og haldið hátíð. Það er gospel- og dægurlagamessa í kirkjunni kl.11 sem er útvarpað beint á rás 1.

Af hverju gospel- og dægurlagamessa?

Við höfum verið að vinna að stefnumótun varðandi helgihald safnaðarins og út úr því kom að við ættum að skapa meiri fjölbreytni í helgihaldinu og auka gleðina,“ segir Jóna Hrönn Bolladóttir sóknarprestur í Garðabænum.

„Þess vegna erum við með klassískar messur, dægurlagamessur, jassmessur og fleira. Króli og Jói messuðu með okkur í nóvember og það var líka frábært. Við hendum engu út en aukum flæðið og fjölbreytnina, því manneskjurnar eru ólíkar og við viljum ná til sem allra flesta.

Við erum með frábæra listamenn að störfum í Vídalínskirkju, eins og hjónin Davíð Sigurgeirsson og Jóhönnu Guðrúnu Jónsdóttur, sem stýra þremur kórum vikulega. Einnig eru með okkur Ingvar Alfreðsson tónlistarmaður og Jóhann Baldvinsson organisti. Þau þrjú fyrrnefndu munu öll þjóna í messunni ásamt gospelkór Jóns Vidalíns sem er algjörlega magnaður.

Gospelkórinn tekur að sér alls konar verkefni en þau slóu eftirminnilega í gegn í kórar Íslands á stöð 2 og George Michael showinu í Hörpu á síðasta ári.  Einn meðlimur kórsins Dísa Sigurðardóttir hefur samið frábæran texta við lagið „This is me“ úr myndinni Greatest Showman, sérstaklega fyrir messuna á sunnudaginn.

Svo má ekki gleyma ræðumanni dagsins sem er hin frábæra skaldkona Guðrún Eva Mínervudóttir, ég hlakka mjög til að hlýða á hana.

Svo bjóðið þið öllum í mat? Já við reiknum með 300-400 manns í kirkjuna og eftir messu eru það lionsmenn- og konur sem laga súpu og bera fram ásamt ýmiskonar krásum.“

Tískusýning í kaffinu
En er algengt að vera með tískusýningu í messukaffinu?

„Nei, en við konur elskum falleg föt og hvað þá að sjá hvað verður ríkjandi í vor- og sumartískunni,“ segir Jóna Hrönn.

„Það eru tvær verslanir á Garðatorginu sem koma með sumarlínuna, Ilse Jacobsen og Baum und Prerdgarten.  Það er eins og Jóna amma mín sagði alltaf ,,Það sakar ekki að vita hvað er til”,“ segir presturinn að lokum.