Það er hefð fyrir því að halda páskavökur víða um heim en ekki eins algengt hér heima á Íslandi. Við erum að sjáfsögðu vön því að vakna snemma á páskadagsmorgni og hugsanlega er til mikils ætlast bæði að vaka fram eftir og eins að vakna fyrir allar aldir. En síðan má ekki horfa fram hjá því að svefnvenjur eru ólíkar.

Laugardagskvöldið fyrir páskadag hefst páskavaka kl. 23:00 í Vídalínskirkju. Stundin hefst á ljósaathöfn. Í kjölfarið fylgir mikill lestur úr Biblíunni. Við fáum að heyra fjölbreytta texta ritningarinnar og íhuga þá. Lestrarnir verða brotnir upp með söng. Eftir að lestrum lýkur þá er komið að kyrrðarbæn. Í hverri viku er stunduð kyrrðarbæn í Vídalínskirkju. Þá sitjum við saman í þögn. Um miðnætti skrýðum við aftur altarið sem var afskrýtt á skírdagskvöldi. Þegar við höfum lokið því endum við stundina á altarisgöngu.

Áður fyrr voru kristnir stundum teknir inn í söfnuðinn á páskavökum. Þá hafði á undan farið mikill lærdómur og lestrarnir á vökunni endurspegla það. Að enda á altarisgöngu minnir líka á þetta. Þau sem voru hluti af söfnuðinum máttu nú taka þátt í altarisgöngunni í fyrsta sinn.

Stundin í Vídalínskirkju verður lágstemmd framan af en endar í fögnuði. Þetta verður ferðalag frá atburðunum sem við minnumst á föstudaginn langa yfir í gleði páskadagsins.

Lagt verður upp úr þátttöku. Söngvarnir verða flestir einfaldir. Stundin verður nokkuð lengri en hefðbundin messa. Vonandi geta sem flestir tekið þátt í þessari spennandi páskavöku. Verið öll hjartanlega velkomin.