MSS býður upp á margvíslegar námsleiðir, starfstengdar og í almennum bóklegum greinum. Lögð er áhersla á sveigjanlegt nám þar sem nemendur geta nálgast námsefni á netinu, óháð tíma og rúmi. Undanfarin ár hefur þróun kennsluhátta tekið markvissum breytingum og í dag eru námsleiðir kenndar í dreifinámi, fjarnámi og samkvæmt hugmyndum vendináms
Menntastoðir eru undirbúningsnám fyrir frumgreinadeildir Keilis, H.R. og Bifrastar auk þess má meta námið sem hluta af bóklegum greinum í iðnnámi. Lokamarkmið Menntastoða er fyrst og fremst að námsmenn auki færni sína í þeim námsþáttum sem kenndir eru þannig að þeir geti tekist á við nám við frumgreinadeild háskóla
Sveigjanleiki og metnaðarfull þjónusta
Kjörorð Menntastoða MSS eru sveigjanleiki í námi, óháð tíma og rúmi, framúrskarandi fjarnámskennsla og metnaðarfull þjónusta og stuðningur við nemendur. Á undanförnum árum hefur þróun og tækni í námi og kennslu tekið mikinn kipp hjá MSS. Stefnan í kennslufræði fullorðinna miðar að frekari þróun og auknum gæðum og að miðstöðin verði framúrskarandi á sviði fjarkennslu og fjarnáms. Svo góður árangur hefur náðst í þróun fjarnáms í Menntastoðum að MSS er leiðandi í fjarnámi meðal símenntunarmiðstöðva á landinu. Gott samstarf er við nokkrar símenntunarmiðstöðvar sem felst í því að nemendur geta stundað fjarnám hjá MSS en sótt stuðning og námsráðgjöf hjá símenntunarmiðstöð í sínum heimabæ. MSS hefur þá umsjón með fjarnámi Menntastoða fyrir þessa nemendur en símenntunarmiðstöðin í heimabæ námsmanns verður eins og námsmiðstöð fyrir hann þar sem hann getur fengið náms- og starfsráðgjöf og aðstoð og stuðning í námi.
10 ára afmæli Menntastoða
Vorið 2019 eru tíu ár frá því að fyrstu Menntastoðir MSS voru settar af stað en námsleiðin var unnin í samstarfi Miðstöðvar símenntunar á Suðurnesjum, Keilis og Fræðslumiðstöðvar atvinnulífsins. Námsleiðin var svar við mikilli eftirspurn eftir námi sem sniðið væri að þörfum fullorðinna námsmanna og myndi auðvelda aðgengi þeirra að ígildi stúdentsprófs og svo háskólanámi í framhaldinu. Alls hafa 549 nemendur lokið Menntastoðum hjá MSS en námskráin er viðurkennd af mennta- og menningarmálaráðuneytinu. Mikil ánægja hefur verið með námsleiðina og hafa nemendur m.a. nefnt það hversu mikil breyting hafi orðið á lífi þeirra við það að hefja nám að nýju eftir margra ára fjarveru úr skóla. Einnig nefna nemendur gjarnan að það hafi komið þeim á óvart hversu skemmtilegt það er að læra og að þeir hafi öðlast sjálfstraust og sjálfsþekkingu í náminu.
Allar nánari upplýsingar um námið, kennslufyrirkomulag og fleira má nálgast á vefsíðu MSS. Námið hefst 11. janúar en skráning er hafin á www.mss.is.