Tungusilungur er með minnstu fiskeldisfyrirtækjum landsins og um leið merkilegt fjölskyldufyrirtæki sem framleiðir hágæða sælkeravörur á borð við birkireyktan regnbogasilung, reykta og grafna bleikju, ferska bleikju, ferskan silung og fleira lostæti. Stór hluti ferskvörunnar fer í útflutning og á Fiskmarkaðinn en aðrar afurðir Tungusilungs fást í verslunum Samkaupa, Mosfellsbakaríi, Fjarðarkaupum, Melabúðinni og í Kolaportinu.
„Faðir minn, Magnús Guðmundsson, stofnaði Tungusilung árið 2002 og síðan hefur fyrirtækið stækkað hægt og rólega,“ segir Freyja Magnúsdóttir, en í þessu fjölskyldufyrirtæki er nú fjórði ættliðurinn kominn til starfa. „Við systurnar fimm komum snemma inn í reksturinn, síðan bættust synir mínir í hópinn og núna eru barnabarnabörn pabba farin að starfa hér í skólafríum á sumrin.“
Starfsemin skiptist í fiskeldi á landi við strendur Tálknafjarðar og fiskvinnslu í þorpinu. Þrír afkomendur Magnúsar starfa við vinnsluna og til viðbótar eru tveir sem vinna við fiskeldið. Í heildina eru níu starfsmenn í fyrirtækinu sem allir tengjast fjölskyldunni að einhverju leyti.
Afurðirnar frá Tungusilungi eru margrómaðar kræsingar og til viðbótar við það sem upp var talið eru þau með á boðstólum svokallað regnbogapaté, þ.e. paté úr reyktum regnbogasilungi. Freyja segist telja að ekki séu aðrir aðilar með sambærilega vöru á markaði.
Tungusilungur er til húsa við Strandgötu 39 á Tálknafirði og hægt er að kaupa vörurnar á staðnum eða panta. Fyrirspurnir má senda í gegnum Facebook-síðu Tungusilungs eða með tölvupósti á tungusilungur@simnet.is. Einnig er hægt að hringja í síma 456-2664 og 863-0977. Skemmtilegast er þó að gera sér ferð um héraðið, kaupa á staðnum, spjalla við starfsfólkið og skoða starfsemina í leiðinni.