„Þetta er gamall og gróinn staður hér í Hafnarfirði, staður sem flestir þekkja og hefur verið starfandi frá árinu 1980. Þetta hefur alltaf verið alþýðustaður, hádegisverðarstaður fyrir vinnandi menn, verkamenn og iðnaðarmenn, og maturinn ber keim af því þar sem áherslan er á ekta íslenskan heimilismat,“ segir Oddsteinn Gíslason, veitingamaður á Kænunni, sem staðsett er að Óseyrarbraut 2, við höfnina í Hafnarfirði.
Oddsteinn keypti staðinn í nóvember árið 2016 og hefur endurnýjað hann mikið að innan og frískað upp á útlitið: „Við höfum unnið markvisst að endurbótum á staðnum. Höfum lagað matsalinn heilmikið til, eldhúsið er nýtt og allir innviðir að verða nýir,“ segir Oddsteinn.
Þrír matreiðslumeistarar eru á staðnum: Oddsteinn Gíslason, Eiríkur Friðriksson og Jón Ingi Ólafsson. Matseldin einkennist í senn af föstum liðum og tilbreytingu. Meðal vinsælla rétta eru lambalæri með bernaise-sósu og purusteik á föstudögum og svo er ýsa í raspi ómissandi á mánudögum.
„Við pössum upp á fjölbreytnina og erum með nýjan matseðil vikulega, auk þess breytum við t.d. reglulega um sósu með lambasteikinni og fleira slíkt. En það eru alltaf fastir liðir á matseðlinum sem ekki má vanta,“ segir Oddsteinn.
Kænan tekur rúmlega 100 manns í sæti en það er oft þétt setið í hádeginu: „Við þrísetjum í hádeginu og það er oft röð út úr dyrum,“ segir Oddsteinn en þetta gengur hratt fyrir sig og mönnum þykir maturinn biðarinnar virði.
Kænan sér um mötuneyti Hafnarfjarðarbæjar og sendir hádegismat í ýmis fyrirtæki sem sum eru í fastri áskrift og önnur í tilfallandi viðskiptum. Þá býður Kænan einnig upp á öfluga veisluþjónustu. Nánari upplýsingar eru á vefsíðunni kaenan.is og á Facebook-síðunni Kænan.
Einnig er gott að senda fyrirspurnir á netfangið steini@kaenan.is eða hafa samband í síma 5651550.