Lömbin geta ekki þagað!
Hér um kvöldið skrapp ég í Fjárhúsið en ég hafði heyrt að þar væri að fá töluvert öðruvísi hamborga ef ekki þann besta í bænum. Lambahamborgarann Móra. Bæjarins besta vilja sumir meina.
Fjárhúsið er staðsett í Matarmarkaðinum úti á Granda og ber nafn með rentu því þetta er eini matsölustaðurinn á landinu þar sem eingöngu er lamb á matseðlinum.
Svo skrítið sem það kann að virðast, á okkar ástkæra útskeri, þar sem við höfum hímt í kulda og trekk með sauðkindinni í hartnær 1200 ár þá hefur lambakjöt varla verið á matseðlum veitingahúsanna fyrr en núna undanfarin ár.
Þetta er sérstakt og það sama má segja um „þjóðarfiskinn“ okkar, ýsuna, sem ansi mörg okkar erum alin upp á, hana er varla að finna á matseðlum landsins.
En hér var ég sem sagt kominn í Fjárhúsið til að prófa þennan sérstaka og þjóðlega hamborgar sem svo miklar sögur fara af.
Ég hef í sjálfu sér ekkert á móti hamborgurum gerðum úr lambakjöti en oftast eru þeir illa heppnaðir. Yfirleitt með of krefjandi bragði og þurrir undir tönn.
Móri er sér á báti
En núna var Bleik brugðið og ekki átti ég von á þessu. Borgarinn Móri er algjörlega sér á báti og er töluvert langt frá því sem búast mátti við, hann kom skemmtilega á óvart.
Móri er passlega safaríkur og mjúkur, bragðgóður með skemmtilegri blöndu af brakandi stökku grænmeti og toppaður með reyktu lamba beikoni. Til hliðar var síðan íslenskt smælki og bragðgóð kryddjurtasósa.
Borgarinn var aldeilis frábær og ég veit að á matseðlinum eru fleiri spennandi réttir úr íslensku lambakjöti að sjálfsögðu. Mæli eindregið með að fólk fylki liði og skundi niður á Granda og fái sér einn Móra.
Niðurtalning hafin að jóla grillveislu Fjárhússins
Flest vita hvað gerðist í fjárhúsinu í borg Davíðs á jólanóttu fyrir nokkuð löngu síðan. Aftur á móti eru færri sem vita hvað gerist Fjárhúsinu úti á Granda í borg Dags um helgar fram að jólum.
Slegið verður upp grillveislu í Fjárhúsinu þar sem í boði verður heilgrillað lamb, „heima bruggaður“ bjór og að sjálfsögðu ótrúlegur góður ís úr Efstadal, sem er víst allgjört sælgæti. Fyrstir koma, fyrstir fá. Verði okkur að góðu
Heimasíðan er: http://www.sheephouse.is/?fbclid=IwAR2AcvXCHSisQdT5RUrKLPyF1IZTzdwX0ee7B2NQT0uKOhOQsN8JLCxKBuY