Ljósin tendruð á jólatré Mosfellsbæjar í dag

Laugardaginn 1. desember verða ljósin tendruð á jólatré Mosfellsbæjar við hátíðlega athöfn á Miðbæjartorginu kl. 16.00. Tendrun ljósanna á jólatrénu á miðbæjartorginu hefur um árabil markað upphaf jólahalds í bænum og á sér fastan sess í hjörtum bæjarbúa sem fjölmenna á viðburðinn ár hvert.

Skólakór Varmárskóla, ásamt skólahljómsveit Mosfellsbæjar, spilar fyrir gesti og gangandi, Matti Matt tekur nokkur jólalög og gera má ráð fyrir að einhverjir jólasveinanna komi ofan úr Esju þennan dag til að dansa í kringum tréð með börnunum.

Kakó, kaffi og nýbakaðar vöfflur

Eftir að dansað hefur verið í kringum jólatréð verður haldið inn í Kjarna þar sem Kammerkór Mosfellsbæjar mun syngja lög ásamt strengjasveit Listaskóla Mosfellsbæjar og Barnakór Lágafellskóla. 4. flokkur kvenna í knattspyrnu í Aftureldingu sér um sölu á heitu kakó, kaffi og vöfflum og jóla Pop-up markaður er opinn í Kjarna frá 12.00–18.00.

Þrettándabrenna, flugeldasýning og jólahyski

Hin árlega þrettándabrenna Mosfellsbæjar verður haldin laugardaginn 5. janúar. Brennan er einn stærsti viðburður bæjarins og á ári hverju leggur mikill fjöldi leið sína í Mosfellsbæ til að taka þátt í hátíðarhöldunum. Blysför leggur af stað frá Miðbæjartorginu kl. 17.30 og gengið verður niður Þverholtið að Leirunum. Skólahljómsveit Mosfellsbæjar leikur og Stormsveitin spilar fyrir gesti. Álfakóngur, álfadrottning, Grýla, Leppalúði og þeirra hyski verða á svæðinu. Björgunarsveitin Kyndill sér um glæsilega flugeldasýningu.

Bókmenntahlaðborð Bókasafns Mosfellsbæjar var haldið 15. nóvember.