Stjörnur og fjölbreytt lagaval

Jólatónleikar Fíladelfíu verða veglegir og glæsilegir að vanda þetta árið. Lagavalið er með afar fjölbreyttu sniði eins og hefur verið í þau 26 ár sem tónleikarnir hafa verið haldnir. „Við verðum með blöndu af hefðbundnum jólalögum, hressu jólagospeli og allt þar á milli. Það verður eitthvað fyrir alla og tónleikagestir mega búast við að hrífast með, fá gæsahúð og jafnvel tár í augun. Við fáum gesti á borð við Júníus Meyvant og Díselu Lárusdóttur til að koma fram með gospelkór Fíladelfíu sem leikur að venju stórt hlutverk á tónleikunum, við búumst við einstaklega góðum tónleikum í ár,“ segir Aron Hinriksson forstöðumaður hjá Fíladelfíu).

Nældu þér í miða

Jólatónleikar Fíladelfíu eru alltaf vinsælir og vel setnir enda þekktir fyrir einstök gæði og gleði. Í ár erum við með ferna tónleika, tvenna mánudaginn 3. desember og tvenna þriðjudaginn 4. desember. Salurinn í Fíladelfíu tekur allt að 500 manns og miðar eru að seljast mjög vel. Það fer því hver að verða síðastur að næla sér í miða á eina glæsilegustu jólatónleika ársins.

„Tónleikarnir verða svo sýndir að vanda á aðfangadag á Stöð 2 í opinni dagskrá. Það jafnast þó auðvitað ekkert við að vera á staðnum og upplifa þessa óviðjafnanlegu jólastemningu sem hér ríkir ár hvert,“ segir Aron.

Allur hagnaður fer í góðgerðamál

Það skemmir svo ekki fyrir að allur hagnaður, umfram kostnað sem fer í tónleikahald, fer til þeirra sem minna mega sín. „Þetta er meira og minna sjálfboðaliðavinna og við notum salinn okkar í Fíladelfíu þannig að kostnaði er haldið í lágmarki. Á hverju ári gefum við nokkrar milljónir í góðgerðarmál. Upphæðin fer þá aðallega til annara góðgerðarsamtaka eins og Mæðrastyrksnefnd, Hjálpræðishersins, Kaffistofu Samhjálpar, og fleiri. Stundum höfum við gefið til einstaklinga eða fjölskyldna sem við vitum að eru í erfiðri stöðu. Þetta er ástæðan fyrir því að við höldum svo stóra tónleika ár hvert.  Það skiptir okkur langmestu máli að geta gefið, enda heita tónleikarnir Jólatónleikar Fíladelfíu, fyrir þá sem minna mega sín,“ segir Aron.

Tónleikarnir eru haldnir í húsnæði Fíladelfíu, Hátúni 2, 105 Rvk

Miðar fást á miðasöluvefnum midi.is