Erótíska símaþjónustan Rauða torgið var opnuð árið 1995 og starfrækt í hartnær 20 ár. Á línum torgsins var hægt að fá alls kyns hljóðræna kynlífsþjónustu, svo sem erótísk samtöl, erótískar upptökur og kynlífssögur. Síðar bauð torgið upp á einkamálaþjónustu á vefsíðu sinni og símastefnumót, fyrir gagn- og samkynhneigða. Stefnumótalínan var ókeypis fyrir konur en karlmenn þurftu að greiða til að hlusta á auglýsingar frá konum. Fleiri aðilar buðu upp á erótíska símaþjónustu en Rauða torgið var sú stærsta á íslenskum markaði. Þjónustan var ekki óumdeild og til dæmis gerði þingmaður Þjóðvaka það að umtalsefni á Alþingi árið 1996 að Póstur og sími innheimti fyrir slíkt „klám“ og að börn og unglingar gætu hlustað á það.