fbpx
Þriðjudagur 24.september 2019  |

DV - Frjáls og óháður miðill

Morðið í miðasölunni


Ritstjórn DV
Sunnudaginn 21. október 2018 21:00

Ash Vale-járnbrautarstöðin Vettvangur síðasta glæps James Alcott.

Ekki missa af Helstu tíðindum dagsins í pósthólfið þitt

Lesa nánar

 Ætla mætti að þeir sem hyggja á rán láti lítið fyrir sér fara á meðan þeir kanna aðstæður. Járnbrautaslökkviliðsmaðurinn James John Alcott hafði þveröfugan hátt á þegar hann skoðaði Ash Vale-járnbrautastöðina skammt frá Aldershot á Englandi þar sem sem hann hafði ákveðið að láta til skarar skríða í ágúst 1952.

Þann 20. ágúst fór James í miðasöluna og spurðist fyrir um ferðir til Dover. Síðan hékk hann á stöðinni og var eftir því tekið hve mikinn áhuga hann virtist hafa á því sem þar fór fram.

Hinn rólegasti

Næsta dag var hann mættur í morgunsárið og tyllti sér niður í vistarverum burðarmannanna, sem þá var auð. Einn burðarmaður sem átti þangað erindi kom að James þar sem hann sat hinn rólegasti og skóf undan nöglum sínum með dálki. Dálkinn sagðist James hafa keypt handa frænda sínum.

James Alcott
Var ekki undrandi þegar hann var handtekinn.

Um kvöldið var James mættur enn eina ferðina. Þá masaði hann við starfsfólk í tvo tíma.

Hann framvísaði skilríkjum Bresku járnbrautanna, gaf upp nafn sitt og sagðist vera slökkviliðsmaður þeirra.

Fékk far heim

James bað um leyfi til að nota símann í miðasölunni; hann vildi athuga með líðan kollega síns, sem hafði slasast. Það var auðsótt mál og að símtali loknu sagði hann við gjaldkera á járnbrautarstöðinni að hann væri í fríi, á leið til Frakklands með eiginkonu sinni.

Gjaldkerinn var önnum kafinn við að ganga frá kvittunum og þvíumlíku og fylgdist James grannt með. Að vakt sinni lokinni bauð hann James far á mótorhjóli sínu til Aldershot, sem hann þáði.

Ljós síðla kvölds

Þann 22. ágúst kom James á stöðina og til hans sást þar sem hann var í símanum í miðasölunni. Stundarfjórðung í átta sagði Geoffrey Dean miðasali við kollega sinn að hann væri að fara að loka, en hann færi þó ekki alveg strax: „Ég þarf að koma skikk á bókhaldið.“

Um klukkustund síðar sá undirliðþjálfi í hernum að, þrátt fyrir að hlerar væru fyrir glugga, enn var ljós í miðasölunni. Hann bankaði í glerið en fékk engin viðbrögð þrátt fyrir að hann heyrði mannamál berast út af henni en hugsaði ekki frekar um það og hvarf á braut.

Margar stungur og mikið blóð

Um klukkustund síðar vakti sama ljós athygli ungs burðarmanns og ákvað hann að segja Geoffrey að kominn væri tími til að fara heim. Mikil var undrun hans þegar hann komst að því að dyrnar að miðasölunni voru læstar innan frá og ekki nokkur leið að sjá þar inn. Fyrir ofan dyrnar var lítill hálfmánalagaður gluggi og með því að hífa sig upp gat burðarmaðurinn kíkt inn um hann. Sá hann þá hvar Geoffrey lá á gólfinu í blóðpolli.

Lögreglan var kölluð til og eftir að hafa brotist inn á skrifstofuna var liðsmönnum hennar ljóst að Geoffrey yrði ekki bjargað. Hann hafði verið stunginn mörgum sinnum og skrifstofunni umturnað.

Gistihús könnuð

Ekki var að undra að nafn James Alcott bæri á góma í samtölum lögreglu og starfsmanna járnbrautarstöðvarinnar, enda hafði maðurinn verið eins og grár köttur á stöðinni, þar á meðal í miðasölunni.

Líkið í miðasölunni
Miðasalinn Geoffrey Dean varðist ræningjanum, en allt kom fyrir ekki.

Í ljósi þess beindist grunur lögreglunnar nánast eingöngu að James og þegar morgnaði kannaði hún gistihús í grenndinni. Fljótlega hljóp á snærið því í gistihúsi við Victoria Road í Aldershot fengust þær upplýsingar að J.J. Alcott hefði tekið herbergi á leigu kvöldið áður og hygðist vera út vikuna. Hann var reyndar ekki inni við þegar þar var komið sögu, en kæmi heim fyrir lokun, klukkan 23.15.

Nýr alklæðnaður

Við leit á herbergi James fannst blóðugur jakki hans á rúminu. Í einum jakkavasanum var blóðugt veski, með bresku vegabréfi í og tveir peningaseðlar með blóðslettum á. Dálkinn fann lögreglan þar sem hann hafði verið falinn í eldstæðisloftrásinni. Við leit utandyra fundust buxur James í runna í nágrenninu.

Þegar James kom á gistihúsið um klukkan ellefu varð ljóst að hann hafði keypt ýmislegt þann daginn. Hann klæddist nýjum jakka, nýjum buxum og skórnir voru einnig nýir. Gömlu skórnir fundust síðar hjá skósmiði nokkrum.

Í sjálfu sér þurfti ekki frekari vitnanna við og sú varð raunin.

Borðleggjandi mál

Þegar James voru sýndir peningaseðlarnir sem fundust í blóðugum jakka hans, sagði hann. „Já, þetta er einhver hluti peninganna.“ Síðan bætti hann við að hann kærði sig eiginlega ekki um þá, því hann ætti sjálfur peninga fyrir fríið.

„Það var ljóst að þið mynduð ná mér. Við tókumst harkalega á og þið finnið fingraför mín úti um allt,“ sagði James og málið taldist upplýst.

Rannsókn lögreglunnar leiddi, henni til mikillar undrunar, í ljós að þetta var ekki í fyrsta sinn sem James hafði orðið manni að bana. Hann hafði sem breskur hermaður verið í Þýskalandi árið 1949 og hafði þá verið dreginn fyrir herrétt fyrir að hafa banað almennum, þýskum borgara.

Annar dauðadómur

Breska krúnan hafði þá hafnað að staðfesta dauðadóm yfir James og honum sleppt um síðir. Við réttarhöld yfir James vegna morðsins á Geoffrey var annað uppi á teningnum og niðurstaðan í Surrey í nóvember 1952 var dauðadómur. Í það skipti var dómnum fullnægt.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Pressan
Fyrir 3 klukkutímum

Fjölskyldan var að taka til heima hjá látna lækninum – Gerðu hræðilega uppgötvun

Fjölskyldan var að taka til heima hjá látna lækninum – Gerðu hræðilega uppgötvun
Pressan
Fyrir 11 klukkutímum

Amazon brennur og við hliðina brennur annað gríðarlega mikilvægt svæði

Amazon brennur og við hliðina brennur annað gríðarlega mikilvægt svæði
Eyjan
Fyrir 12 klukkutímum

Trump rekst á Gretu Thunberg en þau heilsast ekki

Trump rekst á Gretu Thunberg en þau heilsast ekki
433Sport
Fyrir 12 klukkutímum

Sjáðu hverja Aron og Hamren völdu besta – Voru ekki sammála

Sjáðu hverja Aron og Hamren völdu besta – Voru ekki sammála
Pressan
Fyrir 12 klukkutímum

Myndinni var deilt 34.000 sinnum eftir umhverfismótmæli – Síðan kom sannleikurinn í ljós

Myndinni var deilt 34.000 sinnum eftir umhverfismótmæli – Síðan kom sannleikurinn í ljós
433Sport
Fyrir 13 klukkutímum

Lið ársins hjá FIFA: Ronaldo og Messi á sínum stað

Lið ársins hjá FIFA: Ronaldo og Messi á sínum stað
433Sport
Fyrir 13 klukkutímum

Lionel Messi valinn besti leikmaður heims – Rapinoe best kvenna

Lionel Messi valinn besti leikmaður heims – Rapinoe best kvenna
Fókus
Fyrir 14 klukkutímum

Minnsta áhorfið í sögu Emmy-verðlaunanna

Minnsta áhorfið í sögu Emmy-verðlaunanna
Bleikt
Fyrir 14 klukkutímum

Glímdi við átröskun – Óttast nú að dæturnar fari sömu leið

Glímdi við átröskun – Óttast nú að dæturnar fari sömu leið